Frantziako Tourrean ez dago etapa lasairik, beti egon behar da erne, eta aurtengo ekitaldian lehen egunetik ikusi da hori. Izan ere, hainbat faboritok denbora galdu dute lehen etapan, eta ez gutxi. Chris Froomek (Sky), Richie Portek (BMC), Ion Izagirrek (Bahrein) eta Adam Yatesek (Mitcheltonek) 49 segundo galdu dituzte helmugatik bost kilometrora izandago eroriko baten ondorioz. Okerragoa izan da, hala ere, Nairo Quintanaren kasua (Movistar). Helmugarako 3,3 kilometro falta zirela, matxura izan du, eta bi erroberak aldatu behar izan ditu. Denbora asko behar izan du aldatzeko, eta 1.15 galdu du helmugan.
Etapa Fernando Gaviriak (Quick Step) irabazi du, esprintean. Lehen garaipena du Tourrean, eta hark jantzi du elastiko horia. Bigarren Peter Sagan (Bora) izan da, eta hirugarren, Marcel Kittel (Giant). Harekin batera helmugaratu dira itzulia irabazteko faborito gehienak: Mikel Landa (Movistar), Tom Dumoulin (Sunweb), Rigoberto Uran (Cannondale), Vincenzo Nibali (Bahrein)...
Etapari dagokionez, 201 kilometrokoa zen. Hasi eta berehala ihesaldia osatu da, eta helmugatik hamar kilometrora ehizatu dituzte. Amaiera lasaia behar zuena eroriko eta ezbeharrek animatu dute.
