Sekulako handiren bat gertatzen ez bada, Pasai Donibane eta Astillero San Miguel ligan ariko dira datorren urtean. Meirak oso aukera gutxi dauzka onenen artean beste urtebetez jarraitzeko. Atzo jokatu zen igoera kanporaketako lehen jardunaldia, Bermeon. Erlojuaren aurka jardun zuten hiru traineruek, eta pasaitarrak izan ziren azkarrenak, lehen ziabogan azkena izan arren. Lau ehuneneko atera zizkioten Astillerori. Meira oso urruti gelditu zen, hogei segundora.
Astillerok ez irabaztea ezustekoa izan zen. Kiniela guztietan kantabriarrak jotzen zituzten garaile, eta pasaitarrak atzetik, bigarren postuan. Baina alderantzizkoa gertatu zen, eta horri esker, ia-ia ziurtuta daukate igoera pasaitarrek. Baita Astillerok ere, nahikoa duelako gaur, Bilbon, bigarren jardunaldian (12:00etan), Meiraren aurretik sailkatzea.
