Ez Marianne Vos eta ez Rabobank. Eta hori bada nahikoa albiste. Emma Pooleyk (Lotto) irabazi du Giroko seigarren etapa, oso urrutitik erasoa jo, iheskide guztiak atzean utzi, eta, estu eta larri, bakar-bakarrik helmugaratuta. Giro hasiera tristea egin du britainiarrak, eta konfiantza indartzeko garaipen handia da gaurkoa. Behin Carbonai mendate gogorra igarota, Rabobank saiatu da Pooleyren ahalegina ezerezean uzten, baina ihesaldi bikaina dotore biribildu du Lottoko txirrindulariak. Anna Van der Breggen, Marianne Vos eta Pauline Ferrand-Prevot, Rabobankeko hirukoa, helmugaratu da Pooleyren atzetik.
Aprican hasi eta Chiavennan amaitu, zazpigarren etapa jokatuko da bihar, 91,8 kilometrokoa. Ihesaldietarako aproposa izan daiteke eguna.
