"Mentalki nekatuta" egoteagatik erretiratu egin da Oier Aizpurua

Piraguismoa utziko du Oier Aizpuruak (Zumaia, Gipuzkoa; 1978), eta hala jakinarazi du gaur goizean Donostian emandako prentsaurrekoan. Kirol hori "gozatzeko" egin izan du beti eta, haren esanetan, argi zuen "gozatzeari utzitakoan erretiratu" egingo zela. Hala egitea erabaki du, "psikologikoki nekatuta" dagoelako.

Aurten Espainiako hautatzailearekin arazoak izan ditu eta Mundialean parte ez hartzea erabaki du, baina ez da hori izan erabakia hartzeko arrazoi nagusia: "Fisikoki ongi nago eta beste urte batzuetan jarrai nezake, baina mentalki nekatuta nago eta ondo pentsatutako erabakia izan da".

Harekin izan dira K-2 modalitatean hainbat urtez bere kide izan dena -Manolo Bustos espainiarra- eta bere emaztea, besteak beste.

Aizpurua bost bider izan da munduko txapeldun -lautan Bustosekin K2 modalitatean; beste aldian K4an-, eta beste hainbat domina ere irabazi du urte hauetan guztietan.