Indartsu zelairatu dira bi taldeak; Kataluniakoak senyera-ren koloreak soinean; Athleticekoak, berriz, ikurrinaren koloreekin. Lehen minutuetan parekatua izan da partida; Bartzelonak gehiago izan du baloia, eta abagune gehiago izan ditu gola sartzeko, baina Athleticek ondo eutsi dio. Minutuek aurrera egin ahala, ordea, baloia kontrolpean hartu du Bartzelonak eta atsedenaldiaren aurretik aukera ugari izan ditu gola egiteko.
Atsedenaldian Mascherano aulkian geratu da, eta Pique irten da haren tokian. Bigarren zatia ere berdintsu hasi du Bartzelonak, erasora. Bosgarren minutuan gola sartu du, baina baliorik gabe utzi du epaileak, jokoz kanpo egon delakoan. Bigarren zatiko 17. minutuan Munir ordezkatu du Luis Enriquek, eta Neymar zelairatu du. Athleticek aldaketa bikoitza egin du minutu berean: Ibai Gomez zelairatu da Susaetaren ordez, eta Unai Lopez Beñaten ordez. Kataluniako taldeak erasoaldiarekin jarraitu du, eta Athletic bere aukerak aprobetxatzen ahalegindu da.
32. minutuan Sandro irten da zelaira, Pedroren ordez. Aldaketaren ondotik iritsi da Bartzelonaren gola, Neymarren eskutik, Messiren pase baten ondotik. Beste aldaketa bat egin du Valverdek gola jaso ondoren: Mikel Rico kendu du, Borja Viguera zelairatzeko. Jarraian heldu da Bartzelonaren bigarrena, partida amaitzeko bost minutu eskas falta zirenean. Berriro Neymar, Messiren pase bati esker.
