Miamik egurrean jarraitzen du, eta partida erdira du Boston Celtics, Ekialdeko liderra

Ekialdeko Konferentziako talde onena izan nahi duten bi taldeek buruz buru jarraitzen dute borrokan, baina botere sentsazio handiagoa ematen ari da Miami Heat. Charlotte Bobcats menderatu zuten bart etxetik kanpo, 82-96, eta nahikoa izan zen taldeko hiru izarretako biren ekarpen ikusgarria. LeBron Jamesek 38 puntu eta 11 errebote lortu zituen, eta Dwayne Wade taldekideak beste 31 puntu eta 11 errebote. Miami 27-9 balantzearekin dago, eta lortutako hamasei garaipenetatik hamabostetan estatistika bitxia dauka. Hamabost garaipen horietan, Bosh, James eta Waden artean 70 puntuko langa gainditu dute.

Miamik partida erdira dauka Ekialdeko Konferentziako talde onena, Boston Celtics. Berde kolorekoek Minnesotta menderatu zuten etxean, baina justu samar. 96-93 irabazi zuten, eta Minnesottak irabazteko aukera eduki zuen azken unean. Besteak beste, Kevin Love pibotaren partida bikainari esker: 12 puntu eta 24 errebote. Bostonek 26-7 marka dauka orain.

Mendebaldean, Lakersek Konferentziako hirugarren postua galdu izana da berria. Kaliforniakoek ez zuten jokatu, baina Utah Jazzek bai, eta irabazi egin zuen. 102-97 irabazi zion Utah Jazzek Detroiti, eta 24-11 balantzeari esker Lakers gainditu dute. Jardunaldiko jokalari onenetako bat izan zen Denver Nuggetseko Carmelo Anthony. 33 puntu saskiratu zituen Houstonen aurkako garaipenean.

Paco Vazquez lanean hasi da

Bizkaia Bilbo Basketeko Paco Vazquez eskolta lanean hasi zen atzo beste taldekide guztiekin batera. Maokoak ezker eskuko hatz bat hautsi zuen azaroan, eta ebakuntza egin zioten hilabete eta erdi atzera. Entrenatzen hasi izanak ez du esan nahi Vazquez jokatzeko prest dagoenik. Babes batekin hasi da lanean, eta ez du behartuko. Vazquezek ez dio egunik jarri bere itzulerari, eta taldeak ere ez, hori gertatzen den unean Bilbo Basketek arazo bat izango duelako: jokalariren bat aulkian utzi beharko baitu.