Miarritzek Heineken kopari agur erran dio Saracensen aurka galduta (20-16)

Miarritzeri bukatu zaio Heineken kopa. Igandean Saracensen aurka galdu eta gero (20-16), multzoko lehen postua ezinezko dauka. Bigarren postuan sailkatuz geroz ere, final-laurdenetara sartzea ezinezkoa du, beste multzoetako bigarren sailkatuekiko beranta handiegia baitu. Dagoeneko, Top 14ari begira ezarri beharko da Aguilerako taldea.

Miarritzek partida ona egin zuen igandean, eta Yachvilik oso maila altuan dagoela erakutsi zuen berriz ere. Hala ere, Serge Blanco presidenteak entrenatzaileak kritikatu zituen, porrotaren ondoren. «Aldi honetan porrotaren errua entrenatzaileena da. Horrelako partidak irabazteko onenak zelairatu behar dira. Ez nago seguru horrela izan zenik igandean». Blanco Arnaud Hegitaz eta Sylvain Marconnetaz ari da. Bi jokalariak zelaira sartu ondoren, Miarritzeko uztartzeak indarra berreskuratu zuen.

Porrot horren ondotik, multzoko bigarren postua lortzea da helburua. Izan ere, bigarren postuan sailkatzen direnak Europako Challenge-an jokatzera pasatzen dira, Heineken kopan jarraitzen duten bigarren sailkatuen arteko bi onenak salbu. Challenge-a irabazteak Heineken koparako txartela ematen du, eta hori da Miarritzeren aukera bakarra hurrengo sasoian Europan jarraitzeko. Horretarako, bigarren postuan bukatu beharko du multzoan, eta Ospreysi irabazi igande honetan.