Irudiek ez dute zalantzarako tarterik uzten. Ozta-ozta egin ahal izan du ihes Mick Fanning australiarrak marrazoaren erasotik, eta gutxigatik dago bizirik. 2007an ASP World Tourreko txapeldun izandakoari marrazo batek eraso dio Hegoafrikako Jefrrey's Bay-ko txapelketaren finalerdietan, olatu baten zai zegoela, eta ikusleek zuzenean ikusi dute.
Une estuak bizi izan dira. Kamerek zuzenean jaso dute erasoa, eta berehala marrazoen alerta hotsa zabaldu da. "Lasai-lasai nengoen eserita, eta nabaritu dut zerbaitek tira egiten zuela hankan lotua nuen sokatik. Berehala salto egin dut. Oholean mantendu naiz marrazoak jotzen zuen bitartean. Hegal bat soilik ikusi ahal izan diot. Kosk noiz egingo zain nengoen, bizkarrean jo dudan arte", esan du Fanningkek.
Surf proba hori munduko txapelketako egutegian dago, eta finalerdietan ari zen lehiatzen Fanning. Antolatzaileek ohar batean esan dute psikikoki ere onik dagoela surflaria, eta larrialdi zerbitzuen azkartasuna nabarmendu dute. Berehala hurbildu ziren uretan ziren bi surflariengana, eta handik atera zituzten. J-Bay proba bertan behera geratu zen erasoaren ostean.
