Mosku ahaztu, eta behingoz ligan pentsatzeko helburua du Gescrap Bizkaiak

Mina egin du Badalonako porrotak, eta ozen hitz egin du taldeko nagusiak, Marko Banic kapitainak. «Moskuko bi partidetan daukagu burua azken bi asteetan, eta kanporaketak jokatzeko helburua urruntzen ari da gure begien aurrean. Mosku ahaztu, eta ligan jarri behar dugu burua lehenbailehen, ligan gaizki aritzen bagara ez garelako Moskura bueltatuko hurrengo denboraldian».

Mina ematen duen egia, hori ere. Bizkaiak txapelketa politenari, Euroligari begiratu diolako harro, Euroligan jokatzekoaukera ematen duen etxeko lehiaketa alboratuz. Ondorioa, maldan behera. 11. posturaino, oraingoz. Larria? Ez. Garaipen bakarrera dago zortzigarren sailkatua. Arduratzeko modukoa? Bai, hamaika partida bakarrik falta direlako liga erregularra bukatzeko.

Urak bere errotara eramateko asmoz, hurrengo hilabete eta erdiko egutegi samurrarekin gogoratu dira Bizkaiako jokalariak. Samurra, ustez, talde denek edukiko dutelako jokoan zerbait. Hurrengo sei partidetatik lau etxean jokatuko ditu Bizkaiak, eta horiek irabaztea funtsezkoa izanen da 17 edo 18 garaipeneko langa iristeko. Fuenlabrada izango da lehena. Ondoren Estudiantes eta Banca Civicaren aurka ariko da, etxetik kanpo, eta apirileko lehen hiru asteak Miribillako epelean osatuko ditu: Kanaria Handia, Obradoiro eta Valladolid. Irabazteko moduko hiru aurkari, taldeak bere neurria ematen badu.

Fuenlabrada ere larri

Fuenlabrada ere Bizkaiaren paretsu dabil. Koparako sailkatu zen, baina larri dabil Kopako hitzorduaz geroztik, eta 12. posturaino jaitsi. Madrilen urrun samar ikusten dute zortzi aurrenekoen artean sartzea, eta dagoeneko mailari eusteko erronkaz mintzatzen hasi dira. Leo Mainoldiren esana: «Helburu asko ditugu, baina lehena jaitsiera saihestea da, eta oraindik hiru garaipen falta zaizkigu».

Bizkaiak bi hutsune garrantzitsurekin jokatuko du berriro. Gutxi falta zaio D'Or Fischerri, baina ez dute behartu nahi. Roger Grimau ere ez da kantxaratuko.