Napoliren kontra irabazita Txapeldunen Ligako multzoen fasean jokatzeko txartela eskuratuta, Athleticek gaur arratsaldean jakingo du zein hiru talde izango dituen kontrako fase horretan. 17:45ean egingo dute zozketa.
Lau ontzitan banatu dituzte txapelketa jokatuko duten 32 taldeak, eta hirugarren ontzian dago Athletic. Ontzi bakoitzeko talde banak osatuko dituzte multzoak, eta Athleticen ontzi berean daude Bayer Leverkusen, Olympiakos, CSKA, Ajax, Portugalgo Sporting, Galatasaray eta Liverpool. Hortaz, multzoen fasean, zuri-gorriak ez dira talde horien kontra arituko.
Lehen ontzia talde ustez gogorrenek osatzen dute, eta bertan daude Real Madril, Bartzelona, Bayern Munich, Chelsea, Benfica, Atletico Madril, Arsenal eta Porto. Athleticek ezingo du jokatu Espainiako Ligako beste talde batekin, eta, beraz, ontzi horretatik soilik Chelsea, Arsenal, Porto, Benfica eta Bayern izan ditzake multzokide.
Bigarren ontzian ere kontrario latzak egokitu dakizkioke Athletici. Hor daude Manchester City, Borusia Dortmund, Juventus, PSG, Schalke, Shaktar, Basilea eta Zenit. Laugarren ontzian, berriz, ustez talde errazagoak direnak daude, nahiz eta aurkari zailagorik ere badagoen, Erroma eta Monaco kasurako. Bate Borisov, Apoel, Anderlecht, Malmo eta Ludogoretsek osatzen dute laugarren ontzi hori.
Koefizientearen arabera kokatzen dituzte taldeak ontzi batean edo bestean. Athleticek 54.542 puntu ditu, eta Txapeldunen Ligara sailkatu diren taldeen artean 24. postuan dago.
Honakoa da Txapeldunen Ligako egutegia:
Multzoen fasea, lehen jardunaldia: 2014-09-16/17
Multzoen fasea, bigarren jardunaldia: 2014-09-30/10-01
Multzoen fasea, hirugarren jardunaldia: 2014-10-21/22
Multzoen fasea, laugarren jardunaldia: 2014-11-04/05
Multzoen fasea, bosgarren jardunaldia: 2014-11-25/26
Multzoen fasea, seigarren jardunaldia: 2014-12-09/10
Finala 2015eko ekainaren 6an jokatuko da, Berlinen.
