Ostegun eta igande artean egingo dute munduko sokatira txapelketa, Wisconsinen (AEB). Uztailean, Euskal Herriko Herri Kirol Federazioa eskubide osoko kide gisa onartu zuten Nazioarteko Sokatira Federazioan, hamazazpi bozetatik aldeko hamahiru jasota. Horren ostean parte hartuko du euskal selekzioak munduko txapelketan.
Basque Country izenarekin lehiatuko dira, eta Hego Euskal Herriko sokatiralariak bakarrik eraman ahalko dituzte, Frantziak baduelako sokatira federazioa. Kanada, Italia, Hegoafrika, Suitza, Suedia, Ingalaterra, Irlanda, Txina, Belgika, AEBak, Letonia, Alemania, Israel, Herbehereak eta Nigeria izango ditu aurkari euskal selekzioak. Taldekako lehiaketan, Gaztedik, Goiherrik eta Mutrikuk parte hartuko dute.
