Telefonoz hitz egin dute Nazioarteko Olinpiar Batzordeko kideek, eta asteburura arte atzeratu dute Errusia Rioko Olinpiar Jokoetan izango den edo ez baldintzatuko duen erabakia. Richard McLaren abokatuak txostena osatu du Dopinaren Aurkako Munduko Agentziak (WADA) eskatuta. Txostenaren arabera, Errusiako Estatuak "positiboak desagerrarazteko" metodologia bultzatu zuen "dopin antolatua" ezkutatzeko.
Sotxiko Neguko Olinpiar Jokoetako domina zerrendan lehen postuan amaitzea zen dopin sistemaren helburua. Dopina ezkutatzeko, Errusiak Kirol Ministerioa erabili zuela eta FSB isilpeko poliziaren laguntza izan zuela dio McLaren txostenak.
Rioko Olinpiar Jokoak, jokoan
Errusiako kirol federazioak Rioko Olinpiar Jokoetatik kanpo utz ditzake NOBren erabakiak. Thomas Bach batzordeko presidenteak esan du Errusiaren dopin sistema "aurrekaririk ez duen erasoa" dela eta NOBk ez duela "zalantzarik izango tartean diren norbanakoen eta erakundeen aurkako neurririk gogorrenak hartzeko orduan".
Vladimir Putin Errusiako presidenteak adierazi du olinpiar boikoten garaira itzultzeko arriskua dagoela: "Olinpiar mugimendua banatzear dago".
