Aimar Olaizolak eta Aritz Beginok irabazi zuten atzo Eskuz Binakako Txapelketako finala. 22-14 gailendu ziren Xalaren eta Beroizen aurka, Bilboko Bizkaia pilotalekuan jokatu den lehen finalean. Olaizola II.ak zortzigarren txapela du atzokoa, Beginok, lehena.
Hasieratik hasi ziren indartsu Olaizola II.a eta Begino eta 12-5ekoarekin partida erabakita zegoela zirudien. Xalak, ordea, ondo erantzun zuen, eta hiru aldiz berdindu zuten markagailua berak eta Beroizek. 14-14ko berdinketarekin bukaeran paretsu ibiliko zirela zirudien.
Ez zen horrela izan, ordea, nahiz eta 17-14arekin Beginok eskuin hankan min hartu. Kantxara itzuli ondoren, Aimar Olaizolak ez zien aurkariei aukerarik eman, eta beste bost tanto eginez (azken zortziak izan ziren bereak) txapela jantzi zuten berak eta Beginok.
