Olaizola II.ak eta Beroizek laugarren puntua lortu dute

Olaizola II.a eta Beroiz sasoi onean zeudela jakina zen lehendik, baina onean ez, oso onean daudela erakutsi zuten atzo Iruñeko Labrit pilotalekuan. Erakustaldia eman zuten, eta txapelketako laugarren puntua lortu, Bengoetxea VI.ari eta Apraizi 22-9 irabazita. Hala, partidarik galdu gabe jarraitzen dute, eta azken emaitzan alde handiak lortuz, gainera: «Dena bikain atera zaigu Beroizi eta niri, eta halako egunetan gozatu egiten da. Ia-ia lan erdiak eginda ditugu, eta hori gauza ederra da», adierazi zuen Goizuetakoak. Beste hamar partida falta dira lehen ligaxka amaitzeko, eta Olaizola II.ak eta Beroizek oker handia egin beharko lukete finalerdietara ez sailkatzeko.

Lehen tantotik antzeman zen gorriak indartsu zeudela, Beroizek aurkariari bizkarra erakutsi ziolako, eta Olaizolak bikain amaitu zuelako tantoa aurrean. Errukirik gabe ekin zien lehiari, 13-0 aurreratuz. Ez Bengoetxea VI.a eta Apraiz gaizki ari zirelako, irabazleei dena ateratzen zitzaielako baizik. Ordurako hamaika tanto zituzten egindakoak. Ordea, orduantxe etorri zen Olaizolaren lehen hutsegitea, urdinen arnasarekin batera. Pilota aldatu zuten, eta emaitza itxuratzen hasi ziren.

Garaileek burua lehengo lepotik zutela jarraitzen zuten, baina Bengoetxeak aurreko koadroetan tanto politak eskaini zituen. Guztira bost tanto egin zituen leitzarrak, baina sei galdu. Neurketako onena Olaizola II.a izan zen, hamabi tanto amaitu baitzituen. Horietako bederatzi airez. Bengoetxea VI.a eta Apraiz bi garaipenekin daude sailkapenean. Gaur Xala-Laskurain eta Titin III.a-Merino II.a lehiatuko dira Logroñon.

Bestalde, Arretxe II.ak medikuaren senda-agiria jaso zuen atzo, gaua ospitalean igaro ondoren. Begino lagun, Berasaluze VIII.aren eta Albisuren aurka ari zela —1-0 irabazten zihoazen—, izugarrizko pilotakada jaso zuen buruan, eta erietxeratu egin zuten. «Nahiko ongi» dago, eta datorren ostiralean jokatzea espero du. Partida 22-1 eman zitzaien galdutzat Arretxe II.ari eta Beginori.