Olinpiako sua Pekinen

Greziako Olinpia menditik Pekinera bidaia egin du gar olinpiarrak: gaur goizean iritsi da Txinako hiriburura, han ongietorri jaialdia egin ondoren, berriro ere mundura abiatzeko. Hain zuzen ere, 137.000 kilometroko ibilbidea egingo du mundu osoa zehar gar olinpiarrak, 130 egunez, berriro ere Pekinera iritsi eta aurtengo jokoak abiarazi aurretik.

Air China konpainiako hegazkin batean iritsi da su olinpiarra Atenastik Pekinera, eta Greziaren garraren kargu egin zen Liu Qi Pekingo Olinpiar Jokoen Antolaketa Batzordeko buruzagiak jaitsi du.

Ondoren, ibilgailu batean eraman dute Tiananmen plazara, hots, Pekingo gune nagusira. Han egin dute ongietorri ekitaldia, segurtasun neurri handien artean. Txinako Gobernuko agintari nagusiek eta lau milatik gora artistak parte hartu dute ekitaldi horretan.

Behin harrera eginda, mundu osoan zeharreko ibilaldia hasi du. Bost kontinenteetan ibiliko da gar olinpiarra, eta, besteak beste, Everest mendira igo nahi dute.

Gaurko ekitaldietan, eta, halaber, munduan zehar egingo duen itzulian, Tibeten aldeko protestak sortzeko beldur da Txinako Gobernua. Besteak beste, horregatik hartu ditu hain segurtasun neurri zorrotzak.