Orio B izan da KAE 1era igotzeko lehen pausoa eman duena, Erandioko uretan

Orio Bk irabazi zuen atzo KAE 1eko igoera eta jaitsiera erabakitzeko lehen estropada, Erandion (Bizkaia). KAE 1 ligako azken bi sailkatuak, Zierbenak eta Portugaletek, eta KAE 2ko bigarrenak eta hirugarrenak, Orio Bk eta Trintxerpek hartu zuten parte. Orio Bk ezarri zuen markarik onena (20.40.37) eta lehen lau puntuak eskuratu zituen.

Zierbenak ezarri zuen bigarren markarik onena (21.15.52) eta 3 puntu lortu zituen. Portugalete sailkatu zen hirugarren (21.30.90) eta lehen bi puntuak lortu zituen. Azkenik, Trintxerpe helmugaratu zen azken tokian (22.04.01), eta puntu bat lortuta etxeratu zen. Gaur jokatuko da, bestalde, KAE 1eko igoera eta jaitsiera erabakitzeko balioko duen bigarren eta azken estropada. Erlojupeko saioa izango da, atzokoa bezala. San Vicente de la Barqueran (Kantabria, Espainia) jokatuko da, 12:30ean hasita.