Oriok 11. bandera jarraian irabazi nahi du gaur Bilbon, KAE1 ligan

Oriori bi estropada geratzen zaizkio KAE1 ligako trapu denak irabazteko. Orain arteko hamar jardunaldietan, berak astindu ditu bandera guztiak, eta gaur ere,bera da faboritoa. Bilbon lehiatuko dira (17:00), aspaldi batean egundoko sona zuen estropadan. Erlojuaren aurka ari beharko dute arraunlariek, eta hala izanik, nekez gertatuko dira ezusteak. Hortaz, okerrik ezean, Oriok 11. bandera astinduko du gaur. Bigarren lekua ere ondo helduta dago, Santurtziren mesedetan. Biak ariko dira igoera jokatzeko kanporaketan irailean. Jaitsieran daude estuago gauzak, Deustuk aukera duelako azken-aurreko geratu eta zuzenean ez jaisteko. Hondarribia B du aurretik, hiru puntura.

Trintxerpe, igotzeko zorian

KAE2 ligako estropada jokatu zen atzo Santanderren (Espainia), eta liderrak, Trintxerpek, aise menderatu zuen Orio B, bigarrena, hogei segundoren aldeaz. Bi estropada falta dira liga bukatzeko, eta bost punturen aldearekin, hutsa falta du Trintxerpek igotzeko.