Oso itxura eskasa eskainita, Realak azken minutuan galdu du Rayo Vallecanoren aurka, Jonathan Vierak 89. minutuan penaltiz sartutako golaren eraginez —Bravok egin du penaltia—. Hasi eta bukatu, oso motel, ideiarik eta freskotasunik gabe, eta oldarkortasunik gabe aritu dira txuri-urdinak, eta, Leverkusenen gertatu bezala, azken-azken unean jaso dute porrotaren gola. Lehen zortzi partidak jokatuta, zazpi puntu besterik ez dauzkate gipuzkoarrek, eta puntu bakarrera dauzkate jaitsiera postuak. Taldea arnas-estuka zegoen arren, azken unera arte aldaketa bakarra egin du Jagoba Arrasatek —Seferovic, Zurutuzaren ordez—, eta lehertuta amaitu dute jokalariek. Golaren aurretik, lehen zatian, baloi bat langara eta beste bat zutoinera bidali ditu Rayok. Donostiarren kasuan, Agirretxek eduki du aukerarik onena, 71. minutuan, Velaren jokaldiaren ondoren. Baloiari bultza besterik egin behar ez zionean, usurbildarrak kanpora bidali du errematea.
Hamaikakoak:
Rayo Vallecano: Ruben; Arbilla, Ze Castro, Saul, Mojica; Adrian, Trashorras; Lass, N. Castillo, I. Falque; eta Larribey.
Reala: Bravo; C. Martinez, Ansotegi, I. Martinez, De la Bella; Markel, Elustondo, Zurutuza; Vela, Griezmann eta Agirretxe.
Jokaldirik arriskutsuenak:
92. min.: Seferovicen jaurtiketa, ahul, Rubenen eskuetara.
89. min.: Jonathan Vieraren gola, penaltiz. 1-0.
88. min.: Penaltia Bravok Jonathan Vierari.
80. min.: Seferovicen jaurtiketa ona Griezmannen pase sakona jasota eta Rubenen erantzuna. Kornerrean, Iñigo Martinezek gora.
74. min.: Larribeyk buruz kanpora, eta, kontraerasoan, Seferovicek kontrolatu, De la Bellak jaso, eta ezkerrez, kanpora. Esnatzen hasi da Reala.
71. min.: Velak jokaldi dotorea eskuin hegaletik, arean sartu, atzera pasea eman, eta Agirretxek, dena alde zeukanean, kanpora. Realaren aukerarik onena.
68. min.: Larribeyk, buruz, kanpora.
67. min.: Alberto Buenok urrutitik, oso oker, kanpora.
61. min.: Kontraeraso ona Agirretxe eta Velaren artean, eta area ertzetik jaurtiketa Elustondok. Gutxigatik, kanpora.
52. min.: Agirretxek area barruan baloia jaso, buelta erdia eman, eta, lurrera eroriz, oso gutxigatik ezin egin errematea.
50. min.: Kornerra atera Realak, Velak erdiratu, eta oso gutxigatik ez dira iritsi Carlos Martinez eta Iñigo Martinez.
47. min.: Larribeyk errematea egin eta Ansotegik, behartuta, urrundu. Rayo nagusi bigarren zatiaren hasieran.
42. min.: Zutoinera Larribeyk, buruz. Lassek erdiratu, eta aurrelariak, dotore, erremate ona. Bigarren abisu argia.
38. min.: Beste baloi bat lapurtu Agirretxek, Velarekin jokaldia egin, eta area txikian, buruz, usurbildarrak ezin egin ondo errematea.
37. min.: Realak baloia lapurtu, Velak erdiratu eta Agirretxek buruz, behartuta, gora.
33. min.: De la Bellak baloia lapurtu, Agirretxeri pasa, eta buelta erdian, oso behartuta, erremate ahula.
32. min.: Velak kornerra atera eta Ansotegik oso gutxigatik ez du lortu errematatzea.
28. min.: Kornerra atera, jokaldi nahasia area barruan, eta Adrianek, ezkerrez, oso behartuta, langara. Estutzen Rayo.
23. min.: Trashorrasek pase sakona N. Castillori, eta azken unean, bere burua lurrera botata, errematea kendu dio I. Martinezek aurrelariari. Rayoren lehen aukera on-ona.
21. min.: Hirugarren kornerra Rayoren alde. Arriskurik ez.
17. min.: Velak Sauli baloia lapurtu, ezkerrez jaurti eta Rubenek kornerrera. Eta kornerrean, Iñigo Martinezek buruz bigarren zutoinera baloia bidalita, errematerik ez azkenean. Bi aukera on.
15. min.: Falta behartu du Velak ezker erasoan; Zurutuzak atera eta errematerik ez.
13. min.: Bigarren kornerra Rayorentzat. Trashorrasek atera motzean, eta arriskurik ez.
12. min.: Griezmannek kornerra behartu. Arriskurik ez.
7. min.: Griezmannen eta Velaren arteko jokaldia eskuinetik, frantziarrak area ertzetik jaurti, bigun, eta Ruben atezainak gelditu, arazorik gabe.
2. min.: Rayoren lehen kornerra. Arriskurik ez.
