Presiopean jokatuko dute gaur Alavesek eta Realak Mendizorrotzan

Alavesek eta Realak gaur jokatuko duten derbian pentsatzen hasi eta aurreko denboraldian Mendizorrotzan gertatutakoa ez gogoratzea ezinezkoa da. Norgehiagoka hartako azken bost minutuek bi kluben historia baldintzatu zuten. Hilda zegoen Alaves, eta berpiztu egin zuten; orduan galdu izan balu beharbada ez litzatekeelako jokatzen ariko. Realari, berriz, denboraldi osoan ikaragarri sufritu ondoren, lortutako sariak ihes egin zion. Baina futbolak ez du hausnarketarako astirik ematen. Iragana atzean utzi behar da, batzuek zein besteek nahiko lan badutelako dagozkien helburuak betetzen: mailari eutsi Alavesek, eta igoera lortu Realak.

Alavesek indarberrituta ekingo dio derbiari, zaleen babesarekin eta, batez ere, Levanteri bere zelaian irabazteak eman dion konfiantzarekin. Aparteko jokorik egin gabe, hiru gol sartu eta irabazi gabeko bost partidako bolada hausteko gai izan zen. Realak, berriz, denboraldiko unerik txarrenean ekingo dio partidari. Bi porrot daramatza jarraian aurreneko aldiz, eta jokoz antzu dabil. Hiru gol baino ez ditu sartu azken bost jardunaldietan.

Javier Lopezek berriz jarriko du jokoan atzealdeko eskuin hegalean Cesar, eta litekeena da De Marcos gaztea eta Castellano hasieratik aritzea. Aurrealdean Javi Guerrak eta Juanjok jarraituko dute. Azken horrek bere kalitateari zukua ateratzen badio, asko irabaziko du Alavesek. Lillok ere aldaketak egingo ditu: Gerardok hartuko du Carlos Martinezen tokia, eta Rivas hasieratik ariko da, ziurrenik. Ikusteko dago zenbat aurrelarirekin jokatzen duen.



ALAVES-REALA

Alaves. Bonis; Cesar, Almiron, Garro, Albacar; De Marcos, Astudillo, Emilio, Castellano; Javi Guerra, eta Juanjo.

Reala. Bravo; Gerardo, Labaka, Mikel Gonzalez, Castillo; Prieto, Rivas, Aranburu, Marcos; Agirretxe, eta Abreu.

Epailea. Estrada Fernandez.

Lekua. Mendizorrotza (19.840ikusle).

Ordua. 18:00 (ETB1).