PIERRE ROLLAND
Hura da taldeko benetako liderra
•Jaioteguna. 1986ko urriaren 10a.
•Jaioterria. Orleans (Frantzia).
•Ibilbidea. Credit Agricole (2006-2008), Bbox Bouygues Telecom (2009-2010) eta Europcar (2011tik).
•Lorpen garrantzitsuenak. 2007an Tropicale Amissa Bongo itzulian etapa bat (eta bigarren postua sailkapen nagusian) eta Limousingo Tourreko etapa bat; 2008an Dauphineko mendiko maillota; 2010ean Lorraineko zirkuituko etapa bat (eta bigarren postua sailkapen nagusian), Dauphinen zortzigarren eta Nazioarteko Kriteriumeko mendiko maillota; 2011n Frantziako Tourreko etapa bat.
EGUNEKO DANTZA
Voecklerrek ezinaren erakustaldia eman du
Telegraphen gora harro-harro aurreko taldean sartu bai, baina Thomas Voeckler (Europcar) ezinean geratu zen azken bost kilometroetan. Erabat itota, Jerome Pineauren (Quick Step) babesean, ezinaren bizikleta dantza egin zuen gero. Ez aurrea eta ez atzera, itxura kaskarra eman zuen frantziarrak. Antzerkia eginez galdu zuen zeukan indar apurra.
EGUNEKO IPURTERREA
Johnny Hoogerland
Frantziako telebista kate publikoaren auto batek lurrera bota zuenetik, amorrazioaren indarrarekin ari da lehiatzen Johnny Hoogerland (Vacansoleil). Atzo ere lehen kilometroan bertan jo zuen erasoa, eta hari esker gorpuztu zen ihesaldia... Alberto Contadorrek (Saxo Bank) erasoa jo zuen arte.
