Geldialdiak on egin dio Realari. Azken bi jardunaldietan galdu ostean, Imanol Alguacil entrenatzailearen jokalariek 3-1 irabazi zioten atzo Betisi. Ez nolanahi, gainera. Talde txuri-urdinak talde erasokor eta erakargarriaren itxura eman zuen Anoetan, denboraldi honetan tarteka erakutsi duen moduan. Hiru puntu horiekin, Donostiako taldea laugarren posturaino igo da, Atletico Madrilekin eta Sevillarekin hamasei punturekin berdinduta.
Erasoa gidatu zuen Martin Odegaard norvegiarraren ezker hankarekin, Mikel Oiarzabalen freskurarekin, Portƒberdinduuk leku guztietan egoteko duen gaitasunarekin eta William Joseren jaurtiketekin, Reala denboraldi honetako ezusteetako bat bihurtzen ari da. Horri guztiari gaineratu behar zaio partida galduz hasi zuela, hamabigarren minutuan Loren Modon Betiseko jokalariak gola sartuta.
Kontrako gola goiz sartu bazieten ere, txuri-urdinak ez ziren behera etorri. Javi Garciak bere atean gola sartuta eta Willian Josek beste bat sartuta irauli zuten markagailua. Oso ondo jardun zuen taldeak, eta Portuk 58. minutuan erabaki zuen partida. Emaitza horrekin, Betis are eta gehiago hondoratu da sailkapenean.
Realaren garaipenak mesede egin dio, bide batez, Alavesi, atzo Celtari irabaziz jaitsiera postuetatik atera baita modu horretan (Celtaz eta Betisez gain, Eibarrek ere galdu du jardunaldi honetan). Gasteizko taldeak 2-0 irabazi zuen Mendizorrotzan, eta arnasa hartu du. Magallanek 50. minutuan sartu zuena eta Lucas Perezek 82.ean sartutakoa izan ziren Alavesen golak.
Asier Garitanoren taldea sendo agertu zen beste behin zelaian. Grinatsuki jokatu zuten, bihotzarekin eraman zuten taldea aurrera, eta Celtak ezin izan zuen gainetik kendu arabarren presioa. Lehen zatian, espainiarrek gol bat sartu zuten, baina epaileak bertan behera utzi zuen jokaldia VARarekin ikusi ostean. Alavesen aldeko penalti bat ere adierazi zuen, baina Matok langa jo zuen baloiarekin.
Euskal taldeek atzo jokatu zuten beste partidan, Athleticek bana berdindu zuen Valladoliden aurka San Mamesen. Zuri-gorriek gehiago merezi izan zuten, baina zorigaiztoko jokaldi batean beren atean sartutako gol batek kendu zien garaipena ospatzeko aukera. Iñaki Williamsek aurreratu zituen lehen zatian, korrikaldi indartsu batean atzelari espainiarrei aurrea hartu eta maisuki izkin eginez gola sartuta.
Iñigo Martinezek sartu zuen baloia bere atean zorigaiztoko jokaldi batean, baina errua ez zen bakarrik berea izan. Yeraik galdu zuen baloia jokaldiaren hasieran, eta Unai Simon atezainak jaurti zuen gaizki baloia Martinezen aurka, haren gorputza jo eta sarean sartu aurretik. Halaber, aipatzekoa da Simonek Sergi Guardiolaren aurrean egin zuen galdeketa, hura bakar-bakarrik zegoela.
Zigor handiegia izan zen Athleticentzat banakoaren gola, gehiago merezi baitzuen. Edonola, atzokoarekin lau dira Athleticek jarraian irabazi ezin izan dituen partidak, eta sailkapenean behera jaitsi da zortzigarren posturaino, hamahiru punturekin, eta berdinduta dago hamargarren postuan dagoen taldearekin.
Partida jokatu aurretik, Athleticek batzar orokorra egin zuen, eta Aitor Elizegi presidenteak bazkide konpromisarioen babesa izan zuen, baina alde txikiagatik. Aurreko denboraldiko kontuak botoa eman zuten bazkideen %53k onartu zituzten, eta denboraldi honetako aurrekontua, %47k: 284 boto jaso zituen alde, eta 276, kontra. Araudiarekin ere hainbat tirabira izan zituzten. Elizegik «eskarmentu faltari» egotzi dio gertatutakoa. «Zuhurregi jokatu genuen, garbizaleak izateko. Ez genuen egin fede txarrez. Barkamena eskatzen dugu».
