Realak 2-0 galdu du Espainiako Kopako finalerdietako joaneko partida Bartzelonaren aurka. Ez da aldeko emaitza, ezta gutxiago ere, baina partida joan den bezala joan ondoren, txarrena ere ez da. Bartzelona erasoan izan da uneoro, eta horri eusten, defentsan Reala. Gutxi izan dira txuri-urdinen gol aukerak, baina defentsan sendo aritu dira, 2-0 galdu arren.
Realaren jokalari aipagarrienetako bat Eñaut Zubikarai atezaina izan da. Askok kritikatu dute, baina joaneko partida honetan erakutsi du Bravo ordezkatzeko moduan dela, behar denean. Geldiketa bikainak egin ditu, eta pena izan da Bartzelonaren bigarren gola berak bere atean sartu izana; errua ez da berea izan, ordea.
2-0ekoarekin behartuta dago Reala datorren astean Anoetan gutxienez bi gol sartzera. Finala urrun dute txuri-urdinek, baina aintzat hartu behar da gaur partida erdian bat gutxiagorekin jokatu dutela. Nabarmentzekoa da, gainera, neguko merkatuko azken fitxaketak, Canalesek, debuta egin duela.
90. minutua: hiru minutuz luzatuko du partida epaileak.
89. minutua: Txartel horia Zalduarentzat.
84. minutua: Messik jaurtiketa ikusgaria egin du, baina Zubikaraik geldiketa hobea egin du.Pedro eta Iniesta urrutitik ari dira hirugarren golaren bila.
83. minutua: Griezmann hamaikakotik kendu eta Seferovic zelairatu da.
81.minutua: Elustondo azti ibili da, eta baloia kendu dio Pedrori, area barruan.
77. minutua. Hirugarren golaren bila ari da Bartzelona. Realak nahikoa du bat itxaropenari eusteko.
74. minutua: Epaileak txartel horia atera dio Messiri. Alexis aldagelara joan da eta Iniesta atera da bere ordez.
73. minutua: Vela atera eta Canalesek debuta egin du Realarekin.
66. minutua: Zubikaraik ondo urrundu du urrutik egindako jaurtiketa bat. Partida ona ari da jokatzen ondarrutarra. Pena da gola bere atean sartu izana, errua berea ez bada ere.
63. minutua: Epaileak txartel horia atera dio Gaztañagari, Messiri egindako sarrera bategatik.
61. minutua: Ez sinestekoa. Alexisek zutoinera bidali du baloia, Zubikarairen aurrean bakarrik zela. Handik bueltan, ordea, Elustondok gaizki urrundu du baloia eta Zubikarairen gorputzean jo ondoren barrura sartu da. 2-0, Bartzelona aurretik.
60. minutua: Pedrok aukera oso ona izan du Bartzelonaren bigarren gola sartzeko buruz, baina ez da iritsi erdiraketa errematatzera.
55. minutua: Bigarren zatiaren lehen minutuetan ere nagusi agertu da Bartzelona. Zubikarai, beste behin, primeran ari da.
46. minutua: Hasi da bigarren zatia. Aldaketarik ez da izan.
Lehen zatia: ondo eutsi dio Realak Bartzelonari lehen zatian, baina azken minutuetan katalanek gol bat sartzea lortu dute. Busquetsek sartu du, aurreko 44 minutuetan Bartzelona saiatu bai baina ezinean aritu eta gero. Realak ondo defenditu du bere atea, eta Zubikarairen geldiketak erabakigarriak izan dira. Azken jokaldi horretan, ordea, epaileak Iñigo Gonzalez kanporatu du, txartel gorria zuzenean erakutsiz, protesta egiteagatik. Hamar jokalarirekin egin beharko dio aurre bigarren zatian Realak Bartzelonari.
44. minutua: Sergio Busquetsi bakarrik zegoela iritsi zaio baloia area barruan eta ate barrura bidali du. Epaileak Iñigo Martinez kanporatu du txartel gorria erakutsiz, protesta egiteagatik.
43. minutua: Aukera paregabea izan du Velak gola sartzeko, Pintoren aurrean ia bakarrik, baina ez da behar bezala iritsi errematatzera. Realeko zaleek penaltia adierazteko eskatu dute.
38. minutua: Txartel horia Velarentzat.
37. minutua: Falta jaurtiketa arriskutsu batean Messik langara bota du baloia.
32. minutua: Lanak izan dituzte Realeko erdiko atzelariek baloia kanpora ateratzeko.
30. minutua: Urrutitik jaurtiz, ziztu bizian baloia igoz, jokaldia landuz... Ordu erdi pasa da eta Bartzelonak ez du aurkitu oraindik modua gola sartzeko.
26. minutua: Zubikarai berriz ere erabakigarri Bartzelonaren gola oztopatzerakoan. Bikain ari da ondarrutarra. Bitan geratu du Messiren jaurtiketa jokaldi berean.
19. minutua: Carlos Martinez zelairatu da, aurreko jokaldi batean Mikel Gonzalezek min hartu ostean.
17. minutua: Dani Alvesek urrutitik egin du saioa, baina jaurtiketa kanpora joan da.
14. minutua: Estu dabil Realaren defentsa Bartzelonaren erasoa geratzeko.
12. minutua: Bi gol aukera izan ditu Bartzelonak. Lehenengoan Zubikaraik baloia ia ate barrutik atera du. Bigarrengoan gaizki errematatu dute Bartzelonakoek, baina gol aukera apartekoa izan da.
10. minutua: Falta bat azkar atereaz Realaren defentsa ezustean harrapatzen saiatu da Bartzelona.
1. minutua: Hasi da partida. Bartzelona eta Reala aurrez aurre.
Bartzelonaren hasierako hamaikakoa: into, Alves, Pique, Mascherano, Jordi Alba, Xavi, Busquets, Fabregas, Pedro, Alexis eta Messi.
Realaren hasierako hamaikakoa: Zubikarai, Zaldua, Mikel, Iñigo Martinez, Jose Angel, Elustondo, Gaztañaga, Zurutuza, Ansotegi, Griezmann eta Vela.
