Richard Oribek urrezko domina lortu du 200 metro libreetan eta munduko marka hautsi du

Richard Oribe 34 urteko donostiar igerilariak urrezko domina lortu du gaur Pekingo Paralinpiar Jokoetan 200 metro libreetan; urrea lortzeaz gain munduko marka hautsi du 2:55.81eko denborarekin. S4 kategorian lehiatu da Oribe; hots, burmuineko paralisia dutenekin. Igandean 100 libreetan zilarra irabazi zuen.

Bigarren David Smetanine frantziarra izan da (3.04.47), hirugarren Jan Povysil txekiarra (3.06.74).

Oribek, gaurkoarekin, dagoeneko hamahiru olinpiar domina daramatza; horietatik zortzi, urrezkoak. Aurten Pekinen beste bi eskuratzeko helburua du.

Pozik agertu da egindako lanarekin: "Oso pozik nago urrea irabazi dudalako. Atenasen, 2004an, galdu egin nuen, eta zoragarria da berreskuratzea".

Otxoa dominatik gertu txirrindularitzako erlojupekoan

Javier Otxoa 33 urteko txirrindulari barakaldarra (Bizkaia), berriz, podiumetik hurbil ibili da CP3 mailako erlojupekoan baina, azkenean, laugarren izan da. Burmuineko paralisia dutenentzako proban lehiatu da Otxoa, eta hasiera motela egin badu ere, oso bilakaera ona izan du lasterketan zehar, laugarren denborarik onena egiteraino.

Erresuma Batuko Darren Kennyk eta Rik Waddonek eskuratu dituzte urrezko eta zilarrezko domina, hurrenez hurren, batek zein besteak erakustaldi handia eginez. Hirugarren Tomas Kvasnicka txekiarra izan da. Otxoak lasterketa hasi aurretik ezinezkotzat jotzen zuen Errsuma Batuko bi ordezkariei irabaztea, eta bere helburua brontzezko dominaren lehian sartzea zela agertu du. Hurbil izan du, azkenean.

Nolanahi ere, igandeko jazarpen proban domina irabaztea zen Otxoak Pekinera eramandako xede nagusia. Hain zuzen ere, bera zen faborito nagusia, baina deskalifikatu egin zuten. Erlojupekoan lortutak laugarren tokiaren bidez arindu ahal izango du atsekabe hori.