Logroñoko sanmateoetako pilota feria, udako azkena, hilaren 21ean hasi eta 29ra arte luzatuko da. Ohiko denez, binakako torneoak osatuko du bizkarrezurra, eta bikoteak osatzean Aspek eta Asegarcek gazteen, eta Errioxako pilotarien aldeko apustua egin dute. Sei bikoteek ligaxka sistema baten bidez jokatuko dute, bi multzotan banatuta.
A multzoko bikoteak: Olaizola II.a-Untoria, Martinez de Irujo-Cecilio eta Xala-Barriola.
B multzoko kideak: Urrutikoetxea-Albisu, Bengoetxea VI.a-Merino II.a eta Titin III.a-Beroiz.
Multzo bakoitzeko lehen bi sailkatuek jokatuko dute finala, 29an. Jaialdi guztiak Logroñoko Adarraga pilotalekuan jokatuko dira.
Bestalde, azken egunetan indarra hartzen ari zen zurrumurrua ez da gorpuztu. Olaizola II.a eta Irujok Logroñon elkarrekin jokatuko zutela zabaldu zen, bikote eginez, baina enpresek ez dute halakorik erabaki.
