Santurtzik mahai gainean kolpea jo du asteburu honetan. Bizkaitarrek lau estropada zeramatzaten banderarik astindu gabe, baina beste behin ere argi utzi dute Galizian eurek direla onenak: azken bi garaipenekin, han jokatutako sei estropadetatik lau irabazi dituzte. Denboraldi honetan ligan eskuratu dituzten sei garaipenetatik lau han lortu dituzte santurtziarrek.
Atzo buruz buruko ikusgarriaren protagonistak izan ziren Eusko Label Ligako bi oilarrak, Santurtzi eta Hondarribia, eta antzeko ibili dira gaur ere Moañan (Galizia). Bi horiek dira liga irabazteko hautagaiak, eta erakutsi dute zergatia. Lau puntuko errentarekin hasi zuen asteburua Santurtzik, eta seiko tartearekin itzuliko da Euskal Herrira bi estropadaren faltan.
Gaur, lehen ziabogan, pare-parean ziren moreak eta berdeak, arraunzaleen gozagarrirako. Bigarren luzean hartu du hiru segundoko tartea Santurtzik, eta horri eutsi dio azken txanpara arte. Azkenean, lau segundo atera dizkio Ama Guadalupekoa-ri, eta sei hirugarren izan den Oriori, bigarren txandako garaileari.
🟣🟣🟣#EuskoLabelLigapic.twitter.com/CjQ7yo7Fa3
— Eusko Label Liga (@actraineras) August 29, 2021
Ate joka daude Kontxako Estropadak ere, eta igarri da hori Moañako uretan. Aldaketa ugari egin dituzte entrenatzaile batek baino gehiagok. Hala, izan dira ezohiko emaitzak: laugarren egin du Ondarroak, zortzigarren atzo jaitsiera ziurtatu zuen Zarautzek, eta hamargarren Zierbenak.
