Medikuarenera joan da Ekaitz Saralegi, eta erradiografiek argitu dute diagnostikoa. Medikuak bi astez pilota ukitu gabe egoteko agindu dio; beraz, Irujoren aurkako lau t'erdiko ligaxkako partida atzeratuko du. Araudiak atzerapen hori ahalbidetzen du; beraz, azaroaren 16ko asteburuan jokatuko da, ziur asko, Donostian.
Saralegik atzo hautsi zuen hatza, Xalaren aurkako partidako azken txanpan. Bi aste barru jokatzeko, babesen bat jarri beharko du hautsiriko hatzean. Saralegik gutxienez hemezortzi tanto egin behar dizkio Irujori finalerdietan sartzeko. Aurkariak, berriz, garaipena behar du.
