Sasoi luzearen egiazko hastapena, gaur

Sud Radio Challengeko sei partida jokatu eta final-laurdenetarako sailkatu izanak ematen duen ziurtasunarekin ekingo dio gaur Miarritzek Top 16 Liga Xapelgoari. Bigarren multzoan ariko da, Tolosa, Perpinya, Beziers, Narbona, Montauban, Grenoble etaMontpellierrekin batera.

Tolosa Europako txapelduna da, eta azken bederatzi sasoiotan, Frantziako sei txapel jantzi ditu. Perpinyak, berriz, Europako finala jokatu zuen, eta Sud Radio Challengeko final-laurdenetako kanporaketa ere jokatuko du Miarritzeren aurka. Beraz, badute lapurtarrek lehiarik aurten ere. Iaz ez bezala, multzoko lehen sailkatuak ez du Europako Koparako zuzeneko txartelik bereganatuko, eta aurreneko lau sailkatuak sartuko dira finalerdietara.

«Bistan da, gure lehen xedea finalerdietarako postu bat atxikitzea da. Gainera, ezdugu txapelari eusteko iazko presioa, eta lasaixeago jardun dezakegu», adierazi du Lagisquet entrenatzaileak. Miarritzek iaz baino prestakuntza hobea eta luzeagoa burutu ahal izan zuen sasoiaren hastapenean, eta challengean aukera ukan zuten entrenatzaileek gazteen jokoa ikusteko.

Bestalde, internazionalak gabeko lehen hiru partidak irabaztea ere izango dela «lehen erronka» nabarmendu du Lagisquetek. Beziersen aurka jokatuko du lehen partida, gaur (19:30), Beziersko Mediterranee estadioan. Elkarren kontra hiru partida jokatu dituzte hilabete baten buruan.

Miarritzen, Etxeberria, Isaac, Baget eta Diebolt jokatu ezinda daude. Horrenbestez, hauxe izango da hasierako hamabostekoa: Menieu, Gonzalez, Avril; Nauroy, Couzinet; Chouchan, Lievremont (kap.), Milheres; Dupuy, Peyrelongue; Bidabe, Stcherbina, Bousses, Bernat-Salles; Marlu. Ordezkoak, berriz: Campo, Fitzgerald, Manent, Soucaze, Mazas, Maillard eta Gobelet.

Beziersek arazoak ditu lehen lerroa osatzeko, baina joan zen larunbatean baino talde indartsuagoa zelairatuko du.