Superkopan ere derbia erabaki du zozketak

Zozketa egin zuten, baina, egin izan ez balute, hobe. Bili-bolo zebilen Espainiako Superkopako finalerdi bat bi euskal taldeek jokatuko zutela, eta hala izan zen. Denei komeni zaielako. Antolatzaileei, finalean euskal talde batek jokatu eta harmailak beteta egon daitezen. Telebista emankizuneko arduradunei ere bai. RTVErentzat, Bartzelona eta Real Madrilen arteko partidek erakartzen dutelako ikusle gehien. EITBrentzat, berriz, derbia eman ahal izango duelako. Iraileko azken egunean izango da, 30ean, ostiralez, eta 19:00etan.

Bizkaia Bilbo Basketeko Axel Hervellek ezin hobeto adierazi zuen zer espero zuen zozketa berean Baskonia eta bere taldea elkartzen direnean: «Banekien Baskonia izango zela gure aurkaria. Beti gertatu izan da gauza bera, eta gaur horrela gertatzeko arrazoi gehiago zeuden, Superkopa Bilbon jokatuko delako». Bartzelonak eta Real Madrilek jokatuko dute beste finalerdia (21:30). Bartzelona da jarduneko txapelduna.