«Talde guztiek elkar aztertzen dutela jakina da»

Valentzian izan zen Adrian Newey (Stratford-Upon-Avon, Ingalaterra, 1958) bere autoaren lehen itzuliak gertutik jarraitzen. Buru- belarri ari da hura aztertzen, ondo jaio ote den behatzen, eta hura nola azkartu pentsatzen. 1 Formulak azken bi hamarkadatan izan duen diseinatzailerik onenak gauza bat baino ez du buruan: etengabe bere lana hobetzea. Bere hizkeran ere nabari da; murgildu egiten da gai teknikoetan, bere eguneroko lanabesa baita. Lotsatia da izaeraz, flash-en argietatik urruntzen dena, baina bere sorkuntzen inguruan hitz eginez gozatzen du, guru baten modura. Ezin baitzaio bestela deitu titulua hiru talderekin lortu duen diseinatzaile bakarrari. Williams eta McLaren garaileak diseinatu ondotik, Red Bullekin lortu zuen balentria iaz.

Zer da autoan gehien kezkatzen zaituena, gaizki atera daitekeena.

Pneumatikoak gai zaila dira oraingoz ezer esateko. Abu Dhabin probatu bagenituen ere, denbora pasatu da, eta pistan ezin izan ditugu probatu tarte horretan. KERSak ere kezkatzen gaitu, gure ezagutza sortu eta garatu behar izan dugulako arlo horretan, McLarenek eta Ferrarik baino gehiago [gogoratu beharra dago Red Bullek ez zuela KERSa erabili 2009an], eta, alde horretatik, haien atzetik ginelako. Baina kezkarik garrantzitsuena galdutako karga aerodinamikoa berreskuratzea da, eta difusore bikoitzaren debekua ere bai, azken bi urteetan talde guztiek hori garatu baitute.

Baina 2009an difusore bikoitzik gabe hasi zenuten denboraldia, eta autorik onenetakoa zenuten. Jakintza hori abantaila izan da aurten?

Bai eta ez. Aurtengo autoaren gainean lanean hasi ginenean, harritzekoa ez den bezala, bi urte atzera bota eta RB5ak difusore bikoitza jaso aurreko unera arte bistaizoa bota genion, eta hori izan da garapenaren hasierako puntua. Baina talde guztiek ere ikusi dute guk ordura arte zer genuen, eta honezkero ikasi dute jada horretatik. Beraz, abantaila hori dagoeneko oso txikia bilakatu da.

Difusorea azpitik haizatzea [Renaultek egin duen moduan] eraginkorra al da?

Nik uste nahiko soluzio berezia mantendu dugula, arautegiak difusore bikoitza galarazi badu ere. Iaz, ihestutuen haize zati bat difusore bikoitzera zihoan, harekin komunikatzen zuten zulotxo batzuen bitartez, eta beste zatia difusoaren hegoetara zihoan, zeina alboetan dagoen eta atzeko gurpilak saihesten dituen. Noski, aipatu dudan lehen zati hori desagertu egin da aurten, difusore bikoi- tzaren gaineko debekua dela eta, eta bigarren zatia ere asko murriztu da, inguru horretan araudia ere aldatu baita. Nik uste taldeak, edo talde gehienak, ihestutuko gasak modu antzekoan erabiltzen saiatuko direla, baina gehiago landu beharko dira.

Beste taldeek aurkeztu dituzten autoei begirada bota al diezu, edo oraindik zureak bakarrik kezkatzen zaitu?

Gainerako autoei botako diegu begiratua [barrez], baina, oraingoz, ez dut astirik izan. Gainetik ikusi ditut Ferrariaren argazki batzuk; ez dut aurkeztu diren auto guztiak ikusterik izan. Baina sekretua jakina da talde guztiek elkar aztertzen dutela.

McLaren bereziki aztertuko duzu?

Tira, nork daki. Autoak aurkezten diren garai honetan, nahikoa lan izaten da bakoitzaren autoa pistan jarri eta egiten duena ulertzen, haren erantzuna baloratzen. Besteen autoak aztertzeko denbora gutxi dugu.

Oraintxe bertan pneumatikoak galdera ikur handia dira. Zer egin dezakezu haietara ongi ez zaretela moldatu ikusiz gero?

Autoaren konfigurazioa, hori da normalena. Ziurrenik esekidura geometria ere bai... Baina benetan zaila da hori aurrez jakitea.

Beraz, garrantzitsua da aldatzeko askatasun hori ematen duen esekidura.

Bai, hori da arazo nagusia. Pneumatikoekin arazorik izanez gero, esekiduraren lotura puntuak aldatzea da aukera bat, baina, noski, horrekin beste gauza batzuk baldintzatzen dira. Adibidez, aukera hori utziz gero, zurruntasunaren kaltetan izango litzateke, edo pisua handitu edo aerodinamika galdu. Eta hori guztia denboraldian zehar arrastaka eramatea ez da ona luzera begira. Beraz, gauza horiek kontuan izan behar ditut hasierako diseinuan, baina gero bide bat aukeratu eta harekin jarraitu beharra daukat.

Zer da zailena autoa diseinatzean?

Nik uste guztia ondo bilduta izatea oso garrantzitsua dela beti. KERSa ahalik eta ondoena gordetzea, aerodinamikoki ez dezan kalterik eragin. Difusore bikoitza debekatu izanak galarazitako karga aerodinamikoa berreskuratzea ere bai. Eta, horren ondoren, gainerako urteroko garapen prozesua izan da, beti harago iristeko saioa.

Erabiliko duzuen KERSa Magneti Marellirena da, Renaultekin garatu duena. Zuek egingo duzue garapenik urte osoan?

Ez, urte osoa KERS honekin egiteko asmoa dugu. Talde pribatua gara, azken finean, eta ez dugu gure KERS sistema garatzeko nahikoa baliabide. Nik uste baitut KERS sistema bat garatzeko, motoregile izan behar duzula, benetazko motorgile etxe bat izan behar duzula. Gu ez gara motorrak egiten dituen taldea; beraz, guretzat praktikoagoa da Renaultek eskaintzen diguna hartzea.

Zenbateko kostua izan da KERSa erabiltzeko prestatzea?

Ezin dizut zifrarik eman, egia esan, ez baitakit zehazki, baina erantzuna da ez dela asko izan. Funtsean, Renaultek 2009an erabilitako sistema da; beraz, lanik gehiena Renaultek eta Marellik egin dute. Guk batez ere hura kokatu eta inguruko elementu guztiak berriro kokatzen aritu behar izan dugu. Alde horretatik, guztiaren kokapena eta biltze lana 2009koaren alboan nahiko agresiboa da, baina sistema bera oso antzekoa da.

Duela bi urte auto iraultzailea egin zenuen; honako hau zer da, beste iraultzaile bat, ala garapen bat?

Ez, auto hau RB5arekin hasi zen hirugarren belaunaldiko autoa dela esango nuke. Auto harekin norabide egokia hartu genuen eta ez genuen ezer berriro asmatzeko beharrik, baizik eta haren ideiak garatuzjoan den prozesua da.

Norbaitek iraultzailea den zerbait aurkezten duenean besteek urtebete edo bi barru hori gaindi dezakete. Ez zara horren beldur?

Beti zara horren beldur [barrez]. Arrisku bat da, eta hor dago. Baina 1 Formulako autoak araudi baten barruan egin behar dira, eta horren barruan egotea da lehen baldintza.

Aurten pisua 640 kilora igo denez, arazoa al da hori?

Tira, pisua beti da arazo. Baina gidariaren pisua ere kontuan hartzen denez, ez da gauza bera. Sebastianekin ez dugu arazorik. Markekin konplikatuagoa da.

Gidatzeko postura aldatu al da, muturra gorago doala eta?

Ez, oso antzekoa da. Ferrarik bere muturra igo duela ematen du, gure RB6 autoaren itxura emanez, eta, hori eginda, gidariaren hankak ere igo egin dituzte, baina guk ez dugu kasik aldatu.

Ohore bat al da zuretzat gainerako taldeek zuk egindako autoen joerak jarraitzen dituztela ikustea?

Inoiz ez dut pentsatu horretan; beti egon naiz kezkatua gure garapen beharretan. Baina bai, nik uste, iaz askotan entzun behar izan genituela akusazio interesatuak, jende interesatuarengandik, tranpetan genbiltzala ziotenak, altuera aldatzen zuen sistema genuela esanez, edo aurreko aleroi ilegala genuela, edo azpialdea ere ilegala genuela... Baina hori guztia pozez har daiteke, autoa azkarra dela erakusten baitu, eta gainerakoek ematen dioten azalpen bakarra «hori tranpa egiten ari da» izaten baita. Azkenerako aspergarri bilakatu ziren, baina, tira, jokoaren parte da.