Titin III.a eta Merino II.a finalerdietan izango dira, gaur irabaziz gero

Txapelketako orain arteko partidarik garrantzitsuena jokatuko dute gaur Titin III.ak eta Merino II.ak, irabaziz gero finalerdietako ligaxkan sartuko baitira. Berasaluze VIII.aren eta Albisuren kontra arituko dira, Logroñon, eta zaleen babesa eta azken partidetako jokoa baliatu nahi dituzte errioxarrek ezinbesteko puntua lortzeko. Asegarcekoak sailkatuta daude dagoeneko, baina ez dute ezer oparitu nahiko.

Estatistikak alde dituzte Titin III.ak eta Merino II.ak. Lehenengo itzulian nor baino nor gehiago aritu ziren bi bikoteok elkarren kontra, eta Aspekoak nagusitu ziren (22-20). Partida oso gogorra izan zen, eta amaierako tantora arte ez zen erabaki. Bada, gaur ere antzeko ezaugarriak dituen lehia espero da. Bi atzelariak gazteak dira, eta sasoiko daude. Albisuk Merino II.ari bizkarra erakusten badio, aukera asko izango dute Asegarcekoek irabazteko. Lehia polita izango da atzeko koadroetan.

Atzean bi gaztek, eta aurrean, berriz, bi ezagun zaharrek egingo dute topo. Titin III.ak eta Berasaluze VIII.ak bederatzi neurketa jokatu dituzte binaka elkarren aurka, eta errioxarrak zazpi irabazi ditu. Orain hiru jardunaldi pattal ibili zen Triciokoa, baina azken bi neurketetan bere onera itzuli da. Partida erabakigarrietan, gainera, hazi egiten da. Erne, baina, Berasaluze VIII.arekin, errematean eskumutur finarekin baitabil aspaldian. Defentsan zorrotz aritu beharko du berriztarrak.

Txapelketako benetako partida espero da, eta dirua parean aterako da, balitekeen arren Aspekoen aldeko joera txiki bat edukitzea. Merino II.a eta Albisu esperientzia handirik gabeko pilotariak dira oraindik, eta garrantzitsua izango da urduritasunari ongi eustea.

Bihar, bestalde, Gonzalez-Pascualek —Aritz Lasa eta Zubietaren ordezkoek— eta Arretxe II.a-Beginok jokatuko dute, Tolosan (16:30). Ez dago deus jokoan, baina bi bikoteek ohorearen garaipena eskuratu nahiko dute. Aspekoak dira faborito.