Realak ezin izan du punturik eskuratu Transportes Alcainerekin jokatutako partidan, baina kopa jokatzeko postuetan jarraitzen du oraindik ere, liga amaitzeko bi jardunaldi falta dituela.
28. jardunaldiko partida jokatu dute donostiarrek. Partida trabatua izan da lehen zatian, baina atsedenaldia heltzerako egin du Mariak gol bakarra, buruz. Bigarren zatian aukera gehiago izan ditu Realak, besteak beste Aintzane Encinasen eta Eguzkiñe Peñaren bidez, baina ezin izan dute markagailua orekatu.
Nolanahi ere, igandean sailka daiteke matematikoki Reala koparako. Zortzi puntuko aldea dute txuri-urdinek Collerense bederatzigarren sailkatuarekiko, eta, Mallorcako taldeak igandean ez badu irabazten, kopan izango da Reala.
Athleticek, berriz, igandean jokatuko du 28. jardunaldiko partida, Sporting Huelvarekin.
