TXIRRINDULARITZA. Lokatz arrastorik gabe irabazi du

Udazkenean eta neguan jokatzen dira ziklo-kros lasterketak. Goizeko ihintzak bazterrak bustitzen dituen garaietan, hortaz. Izotzak belarra hormatzen duenean. Euriak zelaiak nahasten dituenean. Eta ziklo-krosari lotutako ezinbesteko gaia da, beraz, lokatza. Horregatik, txirrindulariek lokatz arrastoak izaten dituzte bizikletan, maillotean eta kulotean; aurpegian ere bai. Irudi epikoa ziklo-kroslariena. Egungo espezialista onenetakoa da Lars Boom (Rabobank), 2008an Trevison (Italia) munduko txapeldun izandako. Baina nabarmentzen hasi da, eta hemendik aurrera garaipen gehiago lortuko ditu, ziklo-kros denboraldia ez baitu prestatuko. Atzo, esaterako, Vueltako 15. etapa irabazi zuen herbeheretarrak, Kordoban. Eguneko ihesaldian sartu zen, eta azken kilometroetan erakustaldi handia eman eta gero, nagusi. Lokatz arrastorik gabe, garaile. Boomek 23 urte ditu.

Haren atzetik helmugaratu zen David Herrero (Xacobeo). Bilbotarra 60. kilometroaren bueltan sortutako 13 txirrindulariko ihesaldian sartu zen, baina ezin izan zion Boomi eutsi San Jeronimo mendateko aldapetan. Tropelak, berriz, eguna lasai hartu zuen, Andaluziako mendietan barrena azken hiru egunetan hartutako pasadaren ondoren. Dena den, Alejandro Valverde liderrak (Caisse d'Epargne) susto ederra hartu zuen Jaendik irten eta gutxira. 60 txirrindularik segundo batzuetako aldea hartu zuten, eta han ziren Valverde ez beste faborito guztiak. Taldea tiraka jarri, eta liderrak segituan bat egin zuen sustoa eman ziotenekin.

Boomek, berriz, ez zien sustoa eman iheskideei, baina zur eta lur utzi zituen denak. Helmugarako 20 kilometro falta zirela, San Jeronimoko aurreneko maldetan, Vicente Reynes (Columbia), Dominik Roels (Milram) eta Serafin Martinezekin (Xacobeo) egin zuen aurrera. Boom, ordea, ez zegoen geldi egoteko. Ez zuen lotuta joan nahi eta bere hanka luzeei-1,91 metro luze da- astindua eman nahi zien. Hortaz, jo zuen, eta nola, gainera. Segituan ireki zuen aldea atzekoekiko, eta David Herrero hura harrapatzen saiatu zen arren, alferrik. Gainera, kilometroak egin ahala aldeak handitu zituen.

Planta ederra dauka, eta ordekan bikain moldatzen da. Iaz, Rabobanken kontinental mailako taldearekin lehiatuagatik, Herbehereetako txapelduna izan zen, nola errepideko proban hala erlojupekoan. Aurten onenekin batera ari da, eta Belgikako Itzulia irabazi eta gero, atzo bere ibilbideko garaipenik garrantzitsuena lortu zuen. Rabobankekoek, bide batez, eskertuko zioten. Izan ere, Cervelorekin batera Rabobank taldea da aurtengo Tourrean, Giroan eta Vueltan garaipenak lortu dituen bigarren taldea. Lokatz arrastorik gabe, gainera.

Sailkapenak

HAMABOSGARREN ETAPA

1. Lars Boom (Rabobank) 4.12.56

2. David Herrero (Xacobeo) 1.36ra

3. Dominik Roels (Milram) 1.44ra

4. Leonardo Duque (Cofidis) 2.04ra

5. Maxim Iglinski (Astana) d.b.

10. M. Ladagnous (Francaise) 3.23ra

14. Andre Greipel (Columbia) 25.01era

22. Samuel Sanchez (Euskaltel) d.b.

24. Alejandro Valverde (Caisse) d.b.

37. Jose Luis Arrieta (Ag2r) d.b.

43. Haimar Zubeldia (Astana) d.b.

51. Xabier Zandio (Caisse) d.b.

52. David Lopez (Caisse) d.b.

NAGUSIA

1. Alejandro Valverde (Caisse) 65.08.50

2. Robert Gesink (Rabobank) 31ra

3. Samuel Sanchez (Euskaltel) 1.10era

4. Ivan Basso (Liquigas) 1.28ra

5. Cadel Evans (Silence-Lotto) 1.51ra

6. Ezequiel Mosquera (Xacobeo) 1.54ra

7. Joaquim Rodriguez (Caisse) 5.53ra

8. Paolo Tirango (Lampre) 6.34ra

15. Haimar Zubeldia (Astana) 13.34ra

30. A. Txurruka (Euskaltel) 39.02ra

31. Arkaitz Duran (Fuji) 45.29ra

33. David Herrero (Xacobeo) 45.58ra

41. David Lopez (Caisse) 56.55era