TXIRRINDULARITZA. Roche, Kelly... eta agertu da beste bat

Bi baino ez ziren, baina a zer-nolako txirrindulariak biak: Stephen Roche eta Sean Kelly. Irlandarrak biak, kastakoak, eta talentudunak, gainera. 1980ko hamarkadako ziklista onenetakoak izan ziren. Kelly ilegorria klasikozalea eta, gainera, Espainiako Vuelta bat irabazteko gai zena. Laurent Jalaberten ispilua. Eta Roche Frantziako Tourra, Italiako Giroa eta Munduko Txapelketa urte berean irabazi zituena (1987). 1994an eta 1993an erretiratu ziren hurrenez hurren, eta geroztik asko nabarmendu den txirrindularirik ez da loratu Irlandan.

Baina atzo, Avilan, Vueltako 18. etapan, beste bat agertu zen. Normalagoa izango litzateke Nicolas Rochek (Ag2r), Stephenen semeak, edo Dean Martin ilobak (Garmin) garaipen entzutetsuren bat lortzea; batez ere, atzoko garailea baino ezagunagoak direlako, apur bat gehiago munduratu direlako. Baina ez da hala gertatu. Philip Deignan izan da (Cervelo) Irlandari 17 urte geroago itzuli handi batean garaipen bat eman diona. Azkena Rochek lortu zuen, 1992ko Tourrean, La Borboulen, Frantziako Erdialdeko Mendigunean.

Orduan euripean izan zen, eta atzo ere bai. Euripean, Irlandan ia egunero gertatzen zaien bezala. Rochek kontrario guztiak atzeratu zituen, ia banan-banan, eta Deignanek bakarra, baina bakar horrek Roman Kreuziger (Liquigas) dauka izena. Biak batera heldu ziren Avilara, eta txekiarra faborito izan arren, irlandarrak eutsi zion, eta gero errematea eman.

Talavera de la Reina eta Avila lotu zituen 165 kilometroko etapako ihesaldian ibili ziren biak 40. kilometrotik; Mijares lehen mailako mendatea igotzen hasi zirenetik, alegia. Hamasei txirrindularik egin zuten aurrera. Tartean zeuden Igor Anton (Euskaltel), David Herrero (Xacobeo) eta Bingen Fernandez (Cofidis) euskal herritarrak. Tartea ireki zuten, sei bat minutukoa, atzean Euskaltel lanean hasi zen arren. Baina eguneko azken mendatera iritsita, Boqueronera, eta ia lau minutuko aldea pilatuta, argi zegoen etapa aurrekoen artean jokatuko zela. Philippe Gilbertek (Silence-Lotto) jo zuen, baina jaisten hasterakoan harrapatu zuten, eta Avilara aurretik heldu zirenek atzean utzi. Herrero eurekin bat egitekotan egon zen, baina 50 metro falta izan zitzaizkion.

Caisse d'Epargne ari zen ordurako tropeletik tira eta tira. Baina modu lasaian, estresatu gabe. Faboritoak ez ziren mugitu, ibilbidea aproposa izan arren, eta indar apurrak gorde zituzten gaurko.

Sailkapenak

HEMEZORTZIGARREN ETAPA

1. Philip Deignan (Cervelo) 4.19.14

2. Roman Kreuziger (Liquigas) 3ra

3. Jacob Fuglsang (Saxo Bank) 16ra

5. Igor Anton (Euskaltel) 41era

12. David Herrero (Xacobeo) 1.20ra

14. Bingen Fernandez (Cofidis) 4.57ra

19. Samuel Sanchez (Euskaltel) 9.40ra

20. Alejandro Valverde (Caisse) d.b.

30. Haimar Zubeldia (Astana) 9.41era

50. Ruben Perez (Euskaltel) 10.03ra

55. A. Hernandez (Euskaltel) 10.06ra

59. J. Garate (Rabobank) d.b.

71. David Lopez (Caisse) 10.55era

77. A. Txurruka (Euskaltel) 11.15era

NAGUSIA

1. Alejandro Valverde (Caisse) 78.56.42

2. Robert Gesink (Rabobank) 32ra

3. Samuel Sanchez (Euskaltel) 1.10era

4. Ivan Basso (Liquigas) 1.29ra

5. Cadel Evans (Silence-Lotto) 1.51ra

6. E. Mosquera (Xacobeo) 1.55era

7. Joaquim Rodriguez (Caisse) 5.54era

8. Paolo Tiralongo (Lampre) 6.35era

9. Philip Deignan (Cervelo) 7.49ra

10. Juanjo Cobo (Fuji) 10.46ra

14. Haimar Zubeldia (Astana) 13.35era

28. David Herrero (Xacobeo) 39.31ra

29. A. Txurruka (Euskaltel) 44.35era

34. Igor Anton (Euskaltel) 51.55era

40. J. Garate (Rabobank) 59.34ra

Espainiako Vuelta Euskal Herrira ekartzeko asmoa azaldu du Jaurlaritzak

Blanca Urgell Eusko Jaurlaritzako Kultura sailburuak eta eta Patxi Mutiloa kirol zuzendari nagusiak Espainiako Vueltako 18. etapa bertatik bertara ikusi zuten, lasterketako antolatzaileekin batera. Izan ere, Jaurlaritzak Vuelta Euskal Herrira ekartzeko asmoa azaldu du. «Normalizazioaren barruan egonda, Vuelta Euskal Herritik pasatzeak ilusio handia egingo liguke. Momentuz ezin da epeez hitz egin, baina asmoa badaukagu. Antolatzaileekin bat egiten dugu», esan zuen Mutiloak. Datorren urtean, behintzat, ez da izango, Vueltak ia-ia zehaztuta baitauka datorren urteko ibilbidea. 1994an bukatu zen azkenekoz Vueltako etapa bat Euskal Herrian. Iruñean izan zen eta Laurent Jalabertek irabazi zuen. Orduan istiluak izan ziren, eta antolatzaileen sei moto erre zituzten.