TXIRRINDULARITZA. Valverde: «Vuelta datozen hiru egunetan irabaziko da»

Vuelta honetan bigarren atseden eguna eduki zuten atzo txirrindulariek, irailaren 2an izandakoaren ondoren. Orduan ez bezala, ordea, orain gauzak argi samar daude sailkapenean. Garbi dago, esaterako, garailea nagusiko aurreneko seietako bat izango dela, sekulako okerrik ezean. Eta egia da, era berean, Alejandro Valverde liderrak (Caisse d'Epargne) duela aukera gehien. Batik bat, orain arte erakutsi duen sasoiagatik. Haren esanetan, «lasterketa datozen egunetan irabaziko da». Gaur, bihar eta etzi, alegia. «Azken asteak, berriz, lortutako aldea mantentzeko behar luke», esan zuen atzo Valverdek, Almerian.

Ivan Basso bosgarren sailkatuak (Liquigas) badaki Valverdek esandakoa egia biribila dela, eta badaki, aldi berean, liderra indartsu dagoela. Dena den, italiarrak ez du uste espainiarra «garaiezina» denik. «Ni, behintzat, egurra emateko prest nago». Liquigaseko txirrindulariaren ustez, hurrengo hiru etapak «izugarri gogorrak» izango dira, eta aldeak aurrean gehien irauten dutenek egingo dituzte.

Samuel Sanchez seigarren sailkatuak (Euskaltel-Euskadi), hain zuzen, Basso bera «oso ongi» ikusten du. «Cadel Evans (Silence-Lotto) hautagai sendoa da; Valverde beti bezain ondo dago; eta Robert Gesink (Rabobank) une onean heldu da Vueltara. Beraz, muturrean dagoen txirrindulari bat bera ere ezin da baztertu oraingoz», esan zuen atzo Sanchezek. Bera, berriz, «lehian egoteko» prest dago, eta sailkapenean aurrera egitea posible dela uste du. Gainera, pasa den igandean Tudons gainetik jaisten izandako erorikotik ondo osatzen ari da Euskaltelekoa.

Sailkapena

NAGUSIA

1. Alejandro Valverde (Caisse) 45.37.51

2. Cadel Evans (Silence-Lotto) 7ra

3. Robert Gesink (Rabobank) 36ra

4. Tom Danielson (Garmin) 51ra

5. Ivan Basso (Liquigas) 53ra

6. Samuel Sanchez (Euskaltel) 1.03ra

7. Damiano Cunego (Lampre) 2.13ra

8. Ezequiel Mosquera (Xacobeo) 2.24ra

9. Haimar Zubeldia (Astana) 3.10era

10. Tadej Valjavec (Ag2r) 3.13ra

20. Arkaitz Duran (Fuji) 5.48ra

44. J. Garate (Rabobank) 18.57ra

50. A. Txurruka (Euskaltel) 20.13r

52. Egoi Martinez (Euskaltel) 2.13ra

57. David Lopez (Caisse) 24.51ra

59. Beñat Intxausti (Fuji) 25.59ra