TXIRRINDULARITZA. Zabriskiek inoizko batez besteko onena lortu du

Tourreko etapa garaipena (lortzen duen lehenengoa), maillot horia eta urtetan indarrean egon daitekeen marka, horietxek atzo David Zabriskiek lortutakoak. 54,67 kilometro orduko batez bestekoa egin zuen CSC taldekoak 19 kilometroan, 20:51ko denbora, hain zuzen ere. Orain arte Greg Lemond herrikideak zuen errekorra. 1989. urtean lortu zuen, Tourra irabazi zuen urtean, Versallesen. 24 kilometroko erlojupekoan 54,54ko batez besteko lortu zuen Lemondek. Erlojupekoetan ohikoagoak diren distantzian, David Millar eskoziarrak du marka onena. Batez besteko harrigarria egin zuen 2003an, Tourrean, 49 kilometroan: 54,36.