Realzaleek Lyon (Frantzia) hartu dute. Unai Zubeldia BERRIAko kazetaria bertatik bertara ari da hiriko giroaren berri ematen Berriketan sare sozialean: “Metroa Bellecour plazako geltokira iristen den bakoitzeko, geroz eta zale gehiago dago 'Real, Real' oihuka”. Bellecour plazan bildu dira batik bat realzaleak: zifra ofizialen arabera, 3.000 zaletu joan dira Lyonera. Txuri-urdinez jantzi dute zaleek Lyon, nahiz eta gaur beltzez jokatuko duen Realak.
Luis Garcia peñakoak eta Erreala peñakoak han dira, adibidez, eta hainbat herritako lagunak daude, errenteriarrak, donostiarrak... “Batzuei egunak bat egin die gauarekin, eta gehienak orain ari dira iristen hirira”, jakinarazi du Zubeldiak. Festari laguntzeko “eguraldi aparta” dutela adierazi du Zubeldiak.
2013-2014ko Txapeldunen Ligan bietatik zeinek parte hartuko duen erabakiko da bi partiden ostean: gaur izango da lehenengoa, eta datorren asteazkenean itzulerako partida jokatuko da, Anoetan. Realeko jokalariek 11:00etan Lyongo entrenamendu gunean aktibazio lanak egin dituzte, eta 18:45ean abiatuko dira Gerland estadiora.
