Igandean beteko dira hemezortzi urte Pablo Berasaluze pilotaria (Berriz, Bizkaia, 1977) profesionaletan hasi zenetik, eta gaur iragarri du urriaren 1ean jokatuko duela azken partida. Eskuz binakako txapelketako azken bi partidetan Victorrek ordezkatuko du Berrizko aurrelaria. Erretirorako argudioak eman ditu Berasaluzek: "Eguna iritsi da, eta goian utzi nahi nuen. Gazteak indartsu datoz, eta gero eta gehiago kostatzen zait".
Bergarako frontoian egin zuen debuta, 20 urte zituela, 1998an, eta Bilboko Bizkaia pilotalekuan jokatuko du azkena. Titulurik ez, baina hiru aldiz heldu da binakako txapelketako finalera; 1999an, 2013an eta 2015ean. 35 urterekin, bigarren gaztaroan zegoen azken urteetan.
2013ko finalean, lesio batek utzi zuen frontoietatik kanpo hainbat hilabetez. Ordea, osatu eta berriro iritsi zen finalera, Zubieta atzelari zuela.
"Erretiroa hartutakoan, zer?", galdetu zion 2013an Imanol Magro Eizmendi BERRIAko kazetariak, urte horretako apirilean eginiko elkarrizketan. "Ez dakit, baina pilotaren munduan jarraitu nahiko nuke", erantzun zuen Berasaluzek.
