Yao Ming Houston Rockets NBAko saskibaloi taldeko jokalariak jokatzeari utziko dio. Bart egin du iragarpena Txinan inoiz izan den kirolari ezagunenak, Shangain, ehunka kazetariren aurrean. "Gauza asko pasa zaizkit burutik, eta gaur nire ibilbidea amaitu dela eta jokalari profesional gisa saskibaloia utziko dudala esateko moduan naiz", adierazi du.
Aspalditik espero zen iragarpena izan da, ia bi urte baitaramatza lesioz lesio, erabat osatu ezinik. Azkena 2009an jasan zuen, Los Angeles Lakersen aurkako kanporaketan. 1980ko irailaren 2an jaio zen, eta 2,29 metro da luze; NBAko jokalari garaiena zen.
Ama saskibaloi jokalaria zen, eta semea jaio zen unean gurasoak Txinako bikote garaiena ziren. Yao Ming ere saskibaloi jokalari ohi batekin ezkonduta dago. 2005eko maiatzaren 1ean Txinako Errepublikako Demokratikoko langile eredugarri saria jaso zuen.
Shangai Sharks taldean hasi zuen bere ibilbidea, eta bost urtez Txinako Ligan aritu ondoren, 2002ko draft-ean lehen postuan aukeratu zuen Houston Rocketsek. NBAn izan den zazpi denboraldietan titular izan da all-star-ean eta lau aldiz izan da urteko boskote onenean.
