'Gazteiraultza.info' komunikazio proiektua sortu dute Arabako gazteek

Arabako gazte errealitateaz eta gazte mugimenduaren jardueraz informatzeko helburuarekin www.gazteiraultza.info webgunea jarri du martxan Arabako gazte talde batek. «Adierazpen askatasunean oinarritzen da proiektua, edozein alderdi, erakunde edo instituziorekiko independentzia osoz, eta inolako zentsurarik jasan edo ezarri gabe», diote proiektuko sustatzaileek.

Momentuz Interneteko webgunearekin hasi dute bidea, baina aurrera begira irratsaio bat eta paperezko argitaralpen bat egiteko asmoa dute. Bideoaktibismoan ere ariko direla iragarri dute.

«Alferrak, biolentoak, drogazaleak, apalankatuak, zikinak... Egunero sistemaren soldatapeko komunikabideetan gazteoi buruz entzun beharrezkoetaz kokoetaraino gaude», diote Gazteiraultza.info-ko kideek. «Eta horri aurre egiteko modu bakarra guk geuk geure errealitatearen jabe izatea da».

Helburutzat gazte kontzientziaren berbizkundearen ekarpena egitea eta gazteriaren tresna izatea dute. «Horretarako ezinbestekoa da gazte guztion, eta bereziki gazte mugimenduaren ekarpena eta partehartzea, proiektu komunikatibo hau guztion artean eraikitzen joango den lanabesa izango baita». Hala, albisteak bidali nahi dituztenek [email protected] helbide elektronikora idatz dezakete.

Izaera «iraultzailea» izango du proiektuak. «Errealitatea ezagutzeko, erralitatean eragiteko eta errealitatea eraldatzeko, eta ideien gudan murgiltzeko ezinbesteko esparru gisa ulertzen dugu komunikazioa».