Iraultza baten kronika

'Foxfire'

Zuzendaria: Laurent Cantet. Aktoreak: Raven Adamson, Katie Coseni, Claire Mazarolle, Madeleine Bisson. Herrialdeak: Frantzia eta Kanada. Iraupena: 143 minutu.

Amorrutik sortzen diren lehen ekintza espontaneoak. Liderraren bozketarik gabeko kargu hartzea. Izena hautatu, talde izaera bultzatu. Zeremonia arranditsuak kide berrientzat. Ekintza gero eta antolatuagoak. Propaganda hasieran, gero eta ekintza ausartagoak. Hastapeneko iraultzaileen lehen dudak, noraino zabaldu taldea? Errepresioaren lehen kolpeak. Buruzagiaren atxiloketa eta desterrua. Gainerako iraultzaileen nora eza. Buruzagiaren itzulera. Bizimodu erosoa utzi eta oihanera egin. Barne kohesioa handitu lehen lan kolektiboekin. Iraultzaren finantzaketari nola heldu. Dirua bide izatetik helburua izatera. Lehen eztabaidak eta desadostasunak. Liderra gero eta liderrago. Su armen agerpena. Ekintzak gero eta bortitzagoak. Desertzioak, kanporatzeak, desbideratze ideologikoak. Pitzadurak taldean. Erradikalizazioa eta zehar kalteak. Azkenik, bizirik irautea. Hortik aurrera, erosotasun burgeserako itzulera batzuk; betiereko borrokan besteak.

Riot grrrls-en inguruko pelikula baten traza hartuko du hasieran Foxfire-k, baina Cantetek beste norabide bat emanen dio filmari, emakumezkoen Orwellen Animal Farm-en bertsio libre bat egiteraino. Txukun beteko du bere lana, zehaztasun handiz deskribatuko du iraultzaren sorrera, garapena eta porrota, akaso indar eta emozio apur bat falta zaion arren. Ez da iraultzailea, baina ongi harilkatutako film sendoa da.