Harrera epel samarra izan du Wenders beteranoaren (Dusseldorf, 1945) azkeneko filmak gaur goizean egindako emanaldian. Txalo batzuk bai, txisturik ez, baina hoztasuna nabaritu da batez ere Kursaaleko auditoriumean. Gaur gauean areto berberean emango dute filma, Donostiako 65. Zinemaldiaren inaugurazio galan.
Danielle Flinders biomatematikariaren (Alicia Vikander) eta James More zerbitzu sekretuetako agentearen (James McAvoy) arteko amodio istorioa da finean Submergence. Oso arriskutsuak izan daitezkeen lanak egin aurreko egunetan, elkar ezagutuko dute hotel dotore batean, eta berehala hasiko dute maitasun harreman bat. Gero, ordea, bakoitzak bere bidea hartuko du, berriro elkartzeko itxaropenarekin eta gogoarekin.
Hortik aurrera, ordea, Estatu Islamikoko tropek harrapatuko dute More, Somalian, eta Flinders ozeanoko ur sakonetan sartzeko prestaketetan hasiko da. Eta ezingo dira bata bestearekin harremanetan jarri.
Sail Ofizialean, Urrezko Maskorra lortzeko lehian aurkeztu duten lehenengo filma da Submergence. Bihar, berriz, hiru pelikula emango dituzte sail berean: El autor (Manuel Martin Cuenca), La douleur (Emmanuel Finkiel) eta Alanis (Anahi Berneri).
