Fikzio, animazio eta genero dokumentaleko 3.505 film labur aurkeztu dira Zinebin, Bilboko Zinema Dokumental eta Film Laburren Nazioarteko Zinemaldian. 54. aldia izango da aurtengoa; iazkoaren aldean, 484 lan gehiago jaso dituzte. Orain, horien artean hautatu beharko dute Sail Ofizialean zein lehiatuko diren. Fikziozkoak izango dira film gehienak (2.060). Jatorriari dagokionez, Frantziakoak dira aurkeztutako 588 lan, eta Alemaniakoak 275; Ameriketako Estatu Batuetatik, berriz, 240 film aurkeztu dituzte.
Oscar Marinek diseinatu du, beste urte batez, Zinemaldiaren kartela. 2010ean Espainiako Diseinu Saria irabazi zuen Marinek, eta, besteak beste, Bruce Springsteen abeslariaren disko baten azala egin du. Bestalde, Pre-Zinebik eskainiko dituen hitzaldiak, emanaldiak eta Zinebi Express lehiaketa Bilboko Campos Eliseos antzokiko Cupula aretoan egingo dituzte aurten, azaroaren 9tik 16ra bitartean. Zinema eskolak eta alor horretako erakunde ugarik lagunduko dute Pre-Zinebi atala.
