Amiri Baraka, kultura afroamerikarraren ikono nagusietakoa izan zena, atzo hil zen, New Jerseyko (AEB) erietxe batean, 79 urterekin. Antzerkigilea, poeta, saiakera egile eta nobelista ekintzailea ere izan zen, eta artista beltzak beren arrazaren defentsa egitera bultzatu zituen. Black Arts mugimendua sortu zuen, eta black power-en inguruan mugitu zen, nahiz eta gerora mugimendutik alde egin zuen eta marxistatzat jo zuen bere burua
LeRoi Jones izena jarri zioten 1934an jaio zenean, baina 60ko hamarkadan izena aldatu zuen.
Besteak beste, The Essence of Reparations kolonialismoari, jazarpenari eta arrazakeriari buruzko testuen bilduma kaleratu zuen Amiri Barakak, eta musikari buruzko hainbat lan ere argitaratu zituen, besteak beste, Blues People: Negro Music in White America eta The Music: Reflections on Jazz and Blues.
Musikarekiko loturak spoken word-eko hainbat disko grabatzera ere eraman zuen. Besteak beste, Sun Ra eta The Rootsekin egin zuen lan.
