Asteko kontzertuak

Alice Russell + TM Juke

KAfe Antzokia (Bilbo). gaur, 21:30ean. 10 euro.

Steve Wonder edo Aretha Franklin entzuten hazi zen Alice Russell soul kantaria. 2000ko hamarkadaren hasieran, nazioarteko soulean ezaguna egin zen Quantic, Nostalgia 77 edo TM Jukerekin egindako kolaborazioei esker. 2006tik Alice Russell eta TM Juke ekoizle eta DJak bira luzeak egin dituzte elkarrekin AEBetan, Europan eta Australian zehar. Grant Daddy G (Massive Attack), Lonnie Liston Smith, Femi Kuti, De la Soul eta Amy Winehouserekin ere kolaboratu du Russellek. 2008an Pot of Gold disko arrakastatsua argitaratu zuen.



ACCEPT

ROCK STAR LIVE (BARAKALDO).Larunbatean, 21:30ean. 24-39 euro

Alemaniako heavy metal talde beteranoa da Accept. 70eko hamarkadan sortu zen, Solingen hirian, Udo Dirkschneider kantariaren ekimenez. 80ko hamarkadan talde garrantzitsua izan zen speed metalaren bilakaeran. 1997an desagertu zen, eta 2005ean aldi labur baterako berpiztu zen. 2009an berriro batu zen taldea, eta Dirkschneiderren lekua Quick taldeko abeslari ohi Mark Tornillok hartu zuen. 2010eko maiatzaren hasieratik munduko bira egiten ari da taldea, berriz elkartu izana promozionatzeko. Rock jaialdi ugaritan aritu dira, zenbaitetan AC/DC taldearen aurretik joz. Teutonic Rock izenekobideoa estreinatu berri du taldeak.



Boat Beam

Kafe antzokia (BILBO).Bihar, 21:30ean. 12 / 15 EURO.

Lizardi aretoa (Zarautz).Etzi, 22:00etan. 7 euro.

Bi kontzertu emango ditu Boat Beam hirukoteak Euskal Herrian asteburu honetan. Bihar Bilboko Kafe Antzokian ariko da, eta aurretik Maika Makovski bakarlaria ariko da. Etzi Zarauzko Lizardi aretoan izango da, Mursegorekin batera. Josephinek, Alishak eta Aurorak osatzen dute taldea. Bata australiarra da, bestea estatubatuarra eta hirugarrena espainiarra. Gitarrak, biola, txeloa eta pianoa erabiltzen dituzte musika elektroakustikoa sortzeko. Debussy eta Satie ekar dezakete gogora, baita The Cinematic Orchestra eta The Divine Comedy ere. Folk rock aurreratu eta berritzailea egiten dute hiru ahotsekin.