Atxaga eta Jabier Muguruza batera ariko dira Poesia Orduetan

Poesia eta musika elkarren eskutik ibiliko dira berriro ere Poesia Orduak deituriko emanaldietan, Donostiako Viktoria Eugenia antzokian. Astelehenean, Bernardo Atxaga eta Jabier Muguruza elkarrekin ikusteko aukera izango da. Asteartean, berriz, Jon Benitok eta Bide Ertzean Triok lekukoa hartu eta Ez zaitut abandonatuko ikuskizuna eskainiko dute.

Ekitaldien lehen egunean, 20:00etan, Paradisua eta katuak kontaera musikatua egingo dute Atxagak eta Muguruzak. Emanaldia zuzenean grabatuko dute, eta Durangoko Azokan salgai jarriko du grabazioa Pamiela argitaletxeak. Musikariaren eta idazlearen arteko elkarlana oso aspaldikoa da; ez dute hau batera lan egiten duten lehen aldia. Muguruzak idazlearen poema asko musikatu izan ditu, eta hainbatetan batera aritu izan dira biak musika eta poesia uztartzen dituzten emanaldi batzuetan. Horietan azkenetakoa izan zen iaz aurkeztutakoa, Paradisuaz.

Bide Ertzean Triok eta Jon Benito idazleak ere musika eta poesia batuko dituzte Ez zaitut abandonatuko ikuskizunean. Asteartean izango dira Victoria Eugenia antzokian, 20:00etan. «Gutxi edo asko, eta labur esanda, gu maitasun deklarazio bat egitera gatoz», azaldu du Imanol Ubeda Bide Ertzean-eko kideak. « Hainbat poetak gugan eragina izan dute, badira miresten ditugun liburuak, badira miresten ditugun poetak, eta gu Donostiako saio horretan aitortza egitera etorriko gara».