Irailaren 11n ospatuko da Tabakaleraren ate irekiera, 18:00etan, jai batekin. Igandean, ordea, aurreneko ekitaldi publikoa egin zuten inaugurazioari begira. Mishima Kataluniako taldeak eta Mogwai Eskoziakoak kontzertu bat eskaini zuten eraikinean.
Datorren asteazkenean, berriz, Tabakalerako lehen erakusketa aurkeztuko da, Ikus-entzunezkoaren aldiriak. Ingerada marrazten duten puntuak, Anna Manubensek eta Soledad Gutierrezek apailatua, eta Ibon Aranberri, Aimar Arriola, Itziar Barrio, Itziar Okariz, Alex Reynolds eta Iñaki Imaz artisten lanekin osatua, besteak beste.
Euskadiko Filmategiak, Etxepare Euskal Institutuak, Kutxa Fundazioak eta Donostiako Zinemaldiak Tabakaleratik egingo dute lan eraikinean. Urtebeteko epean "martxa ona hartuta" egotea espero du Ane Rodriguez egungo zuzendariak.
