Atzo hasi zen, Iruñean, 4. Flamenco on Fire festibala. Atzotik hilaren 27ra arte, jarduera mordoaz gozatzeko aukera izango da Nafarroako hiriburuan.
Festibalari hasiera emateko, Juan Manuel Cañizares gitarra jotzailearen kontzertua izan zen Nafarroako Orkestra Sinfonikoarekin batera. Festibaleko gune nagusia Baluarte izango da, eta bost kontzertu handi izango dira han: Pedro El granaíno eta Duquende; Carmen Linares, Arcangel eta Marina Heredia; Rafael Riqueni eta Miguel Poveda. Horrez gain, kontzertuak izango dira Zentral aretoan, eta gaueko saioak Tres Reyes hotelean.
Gainera, Flamenco en los Balcones (Flamenkoa Balkoietan) egingo dute hilaren 23an, 24an, 25ean, 26an eta 27an. Kontzertuak izango dira Mañueta kaleko balkoietan (12:00etan), udaletxeko balkoian (12:45) eta La Perla hotelean (13:30). Horrez gain, perkusio, gitarra, dantza flamenko eta konpas tailerrak izango dira.
