'Animal Kingdom'
Zuzendaria: David Michod. Aktoreak: Ben Mendelsohn, Joel Edgerton, Guy Pearce, Luke Ford, Jacki Weaver, Sullivan Stapleton, James Frecheville. Herrialdea: Australia. Iraupena: 112 minutu.
Iaz Sundanceko jaialdian epaimahairen saria jaso zuen filmak, eta horrek bultzada handia eman dio ekoizpen xume honi. Australian marka guztiak apurtu ditu, milaka ikusle bereganatu eta bertako akademiaren 18 izendapen jasota. Nazioartean ere martxa polita darama Animal Kingdom-ek. Lehen lan luzea du Michodek, eta Melbourneri buruzko aurreiritzi guztiak alde batera utzi, eta droga, bortizkeria eta ustelkeriarekin zikinduta dagoen hiriaren alde ezkutua erakutsi nahi izan du. Joshua J Cody nerabea ama galdu ondoren amonarekin bizitzera joanen da. Codytarren beste leinu bat ezagutuko du, eta nahi gabe Joshua giro ustel batean sartuko da. Leckie poliziak inguru arriskutsu eta bortitz horretatik atera nahiko du, baina familiarekiko lotura handiegia da. Hainbatek Scorseserekin konparatu du zuzendari berria.
'Twelve'
Zuzendaria: Joel Schumacher. Aktoreak: Chace Crawford, Emma Roberts, Ellen Barkin, Rory Culkin, Curtis Jackson '50 Cent'. Herrialdea: AEB. Iraupena: 93 min.
Laurogeigarreneko hamarkadaren amaieran eta 90ekoaren hasieran, Joel Schumacherrek nahiko pisu handia zuen Hollywooden. Aukera zuen aktore ezagunekin lan egiteko, eta enkargu garestiak jasotzen zituen, baina inoiz ez zuen pelikula benetan borobilik egin. Bere izarra dezente itzali da azken urteotan, eta orain hala moduzko lanak onartu behar ditu. Nick McDowellen eleberri baten moldaketa bat da Twelve, nerabe eta drogen arteko harremanera eginiko enegarren hurbilketa. Manhattango ikasleek udaberriko oporraldiarekin gozatuko dute, denbora libre dute haien gurasoen dirua gastatzeko. White Mike elite gazte horren droga saltzailea da, behar duten guztia lortzen die. Baina arazoak ditu: ama hil berri zaio, ez daki Mollyri nola adierazi bere maitasuna eta bere lagun onena kartzelan da.
'Season of the Witch'
Zuzendaria: Dominic Sena.Aktoreak: Nicolas Cage, Ron Perlman, Stephen Graham, Claire Foy, Stephen Campbell Moore, Robert Sheehan. Herrialdea: AEB. Iraupena: 92 minutu.
Bigarren pelikula dute elkarrekin Dominic Sena zuzendariak (Kalifornia, Swordfish, Whiteout) eta Nicholas Cage aktore ezagunak. Aurretik, orain dela hamaika urte, Gone in 60 Secondsakzio filma egin zuten. Season of the Witch, baina, oso bestelakoa da. XIV. mendean dago girotuta, orduko Europa ilunean, Euskal Herrian oso ongi ezagutzen dugun testuinguru batean.
Nicolas Cage protagonistak Lavey zaldunarena rola jokatzen du. Emakume gazte bat (Claire Foy aktorea) entregatu diote monasterio batera eramateko. Han azalduko diote gaztea sorgina dela eta hura dela izurrite beltzaren eragile nagusia. Laveyk ez du halakorik sinetsiko, eta beste hainbat zaldunen laguntzaz gaztea askatu eta errugabea dela frogatzen saiatuko da.
