Patxi Huarte Zaldieroa-k 'De Rerum Natura' zinten bosgarren bilduma aurkeztu du gaur. Azken bi urteetan BERRIAn argitaratutako zinta "onenak" daude bilduta. Orain hamar urte ekin zion egunero-egunero zintak marrazteari. Hasierako marrazkietan umore gehiago sartzen zuela dio: “Azkenaldian egiten ditudan marrazkiek amorrutik gehiago dute”.
Liburua “antologikoa” dela azaldu du. Bertan agertzen dira dagoeneko etxekotuta dauden pertsonaiak: La pelota basqua, Eltzekada, La Konsti, Yoda... Eskerrak eman dizkie halaber, Twitter bidez proposamenak bidaltzen dizkiotenei, haiekin lan egitea “auzolana” baita marrazkigilearen iritziz. Liburua BERRIA irakurri, lagundu eta egiten dutenei eskaini die.
