Donostiako 59. Zinemaldia

ZABALTEGI

'Nader and Simin, a Separation'. Berlinalen Urrezko Lehoia irabazi zuen Asghar Farhadik film honekin. Emazteak uzten duenean, Naderrek neska gazte bat kontratatuko du aita zaintzeko, gaixorik baitago hura. Baina ez daki emakume hori haurdun dagoela, senarra burutik eginda dagoela eta haren baimenik gabe lan egiten duela.

'Le chat du rabbin'. Joann Sfar komikigileak eta Antoine Delesvaux ekoizleak zuzendutako filmak sari nagusietako bat irabazi zuen Annecyko animazio jaialdian. Aljerian 20ko hamarkadan girotutako abentura bat da, eta errabino bat, katu bat, xeke arabiar bat, jakitun bat eta aberats errusiar bat ditu protagonista.

SAIL OFIZIALA

'Albert Nobbs'. Rodrigo Garciak (Nine Lives, Fathers and Sons...) aurkeztuko du, lehiaketaz kanpo. Glenn Close du protagonista: ezohiko maitasun hiruko batean harrapatutako emakumea. Gizon jantziko da, XIX. mendeko Irlandan, lan egiteko eta bizi ahal izateko; gizonezkoek menderatutako gizarte horretan emakumeek apenas duten aukerarik.

'Take this Waltz '. Sarah Polley aktoreak laudorio ugari jaso zituen zuzendutako lehen film luzearekin: Away from Her (2006). Film honetan, Margoten eta Danielen artean kimika berezia sortuko da elkar ezagutu bezain pronto. Baina Margot erakarpen hori itotzen saiatuko da, sukaldaritzako liburuen idazle batekin (Lou) zoriontsu ezkonduta baitago.

ITZAL DIGITALAK

'Xiao Dongxi / Thomas Mao'. Thomas margolaria Barne Mongoliako belardietan txango bat egiten ari da, eta Mao ostalari miserableak eman dio ostatu. Filma parabola ezagun batekin hasten da: Zhuangzi filosofoak tximeleta zela egin zuen amets, baina bere buruari galdetu zion ez ote zuen tximeletak amestu Zhuangzi zela….

ZINEMIRA

'Naufragio'. Pedro Aguilera donostiarraren bigarren film luzea da. Immigrazioa du ardatz. Robinsonen ontzia Espainia hegoaldeko kostaldean hondoratu da. Nahikoa lanarekin, itsasertzera iritsi eta salbatzea lortu du. Gizaki anonimoa da, legetik kanpokoa, eta haren burua ahotsez beteta dago.